"ഗ്രാന്മ’നയിച്ചു; അനുരാഗും 
സർക്കാർ സർവീസിൽ

പിണറായി

"വിടാതെ പരിശ്രമിക്കണം, സര്‍ക്കാര്‍ ജോലികിട്ടുംവരെ, ഉറപ്പായും ലക്ഷ്യത്തിലെത്തും’. അമ്മ സുജയുടെ പ്രചോദനവും ഗ്രാന്മയിലെ പരിശീലനവും നിശ്ചയദാർഢ്യത്തോടെയുള്ള പഠനവും അനുരാഗിന്‌ സമ്മാനിച്ചത്‌ എൽഡി ക്ലാർക്ക് പരീക്ഷയിൽ ജില്ലയിൽ ഏറ്റവും കൂടുതൽ മാർക്ക്. സർക്കാർ ജോലിയെന്ന സ്വപ്നം തലമുറകളിലേക്ക് കൈമാറി യാഥാർഥ്യമാക്കുകയാണ് പിണറായിലെ പിഎസ്‌സി പരിശീലന കേന്ദ്രം 'ഗ്രാന്മ'. ചെറുമാവിലായി 'സുകൃത'ത്തിൽ കെ കെ ചന്ദ്രന്റെയും കെ സുജയുടെയും മകൻ കെ അനുരാഗ് ബിരുദ പഠനം പൂർത്തിയായ ഉടനെ ഗ്രാന്മയിൽ പരിശീലനത്തിന് ചേരുകയായിരുന്നു. മൂന്നുവർഷത്തെ തുടർച്ചയായ പരിശീലനത്തിലൂടെയാണ് നേട്ടം. അമ്മ സുജയും ഗ്രാന്മയിലെ പരിശീലനത്തിലൂടെയാണ്‌ വനിതാ ശിശുക്ഷേമ വകുപ്പിൽ ജോലി നേടിയത്‌. അനുരാഗിന്റെ സഹോദരി കെ അനന്യ എൽജിഎസ് റാങ്ക് ജേതാവാണ്. സുജയുടെ സഹോദരി ശോഭന തലശേരി കോടതിയിലും അനിയന്റെ ഭാര്യ ശബാന പഞ്ചായത്ത് വകുപ്പിലും അനിയത്തിയുടെ മകൻ സൗരവ് പൊലീസ് സേനയിലും ഗ്രാന്മയിലെ പരിശീലനത്തിലൂടെ സർക്കാർ സർവീസിൽ പ്രവേശിച്ചു. മുമ്പ് ഗ്രാന്മയിൽ പഠിച്ച് ട്രഷറി വകുപ്പിൽ ജോലി നേടിയ എൻ കെ സന്ധ്യയുടെ മകൻ പി അതുൽരാജ്‌ പൊതുമരാമത്ത് വകുപ്പിലും പഞ്ചായത്ത് വകുപ്പിൽ ജോലിനേടിയ കെ സ്മിതയുടെ മകൾ കെ സ്മൃതി കെഎസ്ഇബിയിലും ജോലിനേടിയതും ഗ്രാന്മയിലൂടെത്തന്നെ. ജില്ലയിൽ ഏറ്റവും കൂടുതൽ ഉദ്യോഗാർഥികളെ സർക്കാർ സർവീസിലെത്തിച്ച ഗ്രാന്മ കഴിഞ്ഞ എൽഡിസി, -എൽജിഎസ് പരീക്ഷകളിൽ ഉന്നതവിജയം നേടിയവരെ ആദരിച്ചു. റാങ്ക് ജേതാക്കളെ ആദരിക്കൽ ചടങ്ങിൽ ഗ്രാന്മയിലെ പൂർവവിദ്യാർഥിയും ജില്ലയിലെ ആദ്യ വനിതാ എക്സൈസ് ഇൻസ്പെക്ടറുമായ കെ അനുശ്രീ മുഖ്യാതിഥിയായി. അനുരാഗിന് പി കെ പ്രതീഷ് ഉപഹാരംനൽകി. ഗ്രാന്മ പ്രസിഡന്റ് എ എം വിജേഷ് അധ്യക്ഷനായി. ചടങ്ങിൽ പി വിജിത്ത് സ്വാഗതവും അശ്വനി മോഹൻ നന്ദിയും പറഞ്ഞു. ​ജില്ലയിൽ കഴിഞ്ഞ തവണ എൽഡിസി ഒന്നാം റാങ്ക് ഗ്രാന്മയിലെതന്നെ നവജ്യോത് നേടിയിരുന്നു. എൽജിഎസ് റാങ്ക് ലിസ്റ്റിലെ മെയിൻ ലിസ്റ്റിൽ 72 പേരും എൽഡിസി ലിസ്റ്റിൽ 64 പേരും ഗ്രാന്മയിൽ നിന്നുള്ളവരാണ്. ഗ്രാന്മ ഇപ്പോൾ പിണറായിയിലും തലശേരിയിലും കണ്ണൂരിലും ചാലോടുമായി ക്ലാസുകൾ നടത്തുന്നു.