മേയറുടെ പ്രഖ്യാപനം പാഴ്‌വാക്കായി

കണ്ണൂർ

കണ്ണൂർ കോർപ്പറേഷന്റെ മൾട്ടിലെവൽ കാർ പാർക്കിങ് കേന്ദ്രം ഉടൻ തുറക്കുമെന്ന മേയറുടെ പ്രഖ്യാപനവും പാഴ്‌വാക്കായി. ന​ഗരത്തിലെ ​ഗതാ​ഗതക്കുരുക്കിന് പരിഹാരം കാണാനാണ് കണ്ണൂർ ജവഹർ സ്റ്റേഡിയത്തിന് സമീപത്തും കണ്ണൂർ സ്റ്റേറ്റ് ബാങ്കിന് എതിർവശത്തും മൾട്ടിലെവൽ കാർ പാർക്കിങ് കേന്ദ്രം നിർമിച്ചത്. തുടക്കംമുതൽ നിർമാണ പ്രവൃത്തികൾ പലതവണ തടസ്സപ്പെട്ടിരുന്നു. 2021ൽ നിർമാണം ആരംഭിച്ചപ്പോൾ ഏതാനും മാസത്തിനുള്ളിൽ തുറക്കുമെന്നായിരുന്നു പറഞ്ഞിരുന്നത്. 2023 മേയിൽ ജവഹർ സ്റ്റേഡിയത്തിന് സമീപത്തെ കാർപാർക്കിങ് കേന്ദ്രത്തിൽ ട്രയൽറൺ നടത്തി. ഉടൻ പ്രവർത്തന സജ്ജമാക്കുമെന്ന് അറിയിച്ചെങ്കിലും നടപടിയുണ്ടായില്ല. രണ്ടുമാസംമുമ്പ്‌ കോർപ്പറേഷനെതിരെ പ്രതിഷേധം കടുത്തപ്പോൾ രണ്ടുമാസത്തിനുള്ളിൽ പ്രവർത്തനം തുടങ്ങുമെന്ന് മേയർ മുസ്ലീഹ് മഠത്തിൽ വാർത്താസമ്മേളനം നടത്തി അറിയിച്ചിരുന്നു. എന്നാൽ ഈ പ്രഖ്യാപനവും പാഴ്‌വാക്കായി. കാർപാർക്കിങ് കേന്ദ്രം രാത്രി മദ്യപസംഘങ്ങളുടെ താവളമാണ്‌. നടോടികളും ഇവിടെയാണ് കഴിയുന്നത്. അമൃത് പദ്ധതിയിൽ ഉൾപ്പെടുത്തി 11 കോടി രൂപ ചെലവിലാണ് രണ്ടിടത്ത്‌ മൾട്ടിലെവൽ കാർ പാർക്കിങ് കേന്ദ്രം നിർമിച്ചത്. കണ്ണൂർ ന​ഗരം അനധികൃത പാർക്കിങ്ങിൽ പൊറുതിമുട്ടിയിരിക്കുകയാണ്. പ്രധാന റോഡുകളിലെല്ലാം അലക്ഷ്യമായി പാർക്ക് ചെയ്യുന്നത് ഗതാ​ഗതക്കുരുക്കുണ്ടാക്കുകയാണ്‌. കേന്ദ്രം തുറന്നാൽ ന​ഗരത്തിലും റെയിൽവേ സ്റ്റേഷനിലുമെത്തുന്ന വാഹനങ്ങൾക്ക് പാർക്കിങ് സൗകര്യമാകും.