കൊട്ടിയൂരിൽ രോഹിണി ആരാധന

കൊട്ടിയൂർ വൈശാഖ മഹോത്സവത്തിലെ നാലാമത്തെ ആരാധനയായ രോഹിണി ആരാധനയോടനുബന്ധിച്ച് ഞായറാഴ്ച കൊട്ടിയൂരിൽ വൻ തീർത്ഥാടനത്തിരക്ക്. ഉച്ചയോടെ തിരുവഞ്ചിറ നിറഞ്ഞു. ആരാധനയോടനുബന്ധിച്ച് കുറുമാത്തൂരിലെ മുതിർന്ന കാരണവർ ഉണ്ണികൃഷ്ണൻ നമ്പൂതിരിപ്പാട് ആലിംഗന പുഷ്പാഞ്ജലി നടത്തി. ശീവേലിക്ക് മുന്നോടിയായാണ് ആലിംഗന പൂജ നടന്നത്. രോഹിണി ആരാധനയ്ക്ക് തലേന്ന് ശനിയാഴ്ച മണത്തണ ഗോപുരത്തിൽ എത്തിയ നായ്ക്കൻ താനികൻ ഉണ്ണികൃഷ്ണൻ നമ്പൂതിരിപ്പാടിനെ മണത്തണ ആക്കൽ തറവാട്ടിലേക്ക് ആചാരപൂർവം സ്വീകരിച്ചു. ഞായറാഴ്ച രാവിലെ കുണ്ടേൻ ക്ഷേത്രത്തിൽ എത്തിയ സ്ഥാനികൻ പ്രാർത്ഥനകൾക്ക് ശേഷമാണ് അക്കരെ കൊട്ടിയൂരിലെത്തിയത്.