10 സെന്റിന്റെ സമ്മതപത്രം കൈമാറി

തൃശൂർ

പ്രൊഫ. എം മുരളീധരൻ പെയിൻ ആൻഡ്‌ പാലിയേറ്റീവ്‌ സൊസൈറ്റിക്കായി 10 സെന്റ്‌ ഭൂമി നൽകുന്നതിനുള്ള സമ്മതപത്രം കൈമാറി. സിപിഐ എം തൃശൂർ ഏരിയ കമ്മിറ്റി ഓഫീസായ ഇ എം എസ്‌ സെന്ററിന്റെ ഉദ്‌ഘാടനത്തോടനുബന്ധിച്ചുള്ള പൊതുസമ്മേളന വേദിയിൽ വടൂക്കര സ്വദേശി എസ്‌എൻ നഗർ ഏർളി വീട്ടിൽ വിജയലക്ഷ്‌മി (82) സമ്മതപത്രം സംസ്ഥാന സെക്രട്ടറി എം വി ഗോവിന്ദനെ ഏൽപ്പിച്ചു. വിജയലക്ഷ്‌മിയുടെ ആകെയുള്ള സന്പാദ്യമാണ്‌ 10 സെന്റ്‌ ഭൂമി. ഒറ്റയ്ക്ക്‌ താമസിക്കുന്ന ഇവരുടെ സംരക്ഷണം പ്രൊഫ. എം മുരളീധരൻ പെയിൻ ആൻഡ്‌ പാലിയേറ്റീവ്‌ സൊസൈറ്റി ഏറ്റെടുക്കും. സൊസൈറ്റിക്ക്‌ കൈമാറുന്ന സ്ഥലത്ത്‌ നിർമിക്കുന്ന കെട്ടിടത്തിൽ വിജയലക്ഷ്‌മിക്ക്‌ മുറിയും നൽകും. എന്നെ പോലെ ഒറ്റയ്ക്ക്‌ താമസിക്കുന്നവരുടെ അഭയകേന്ദ്രമായി പ്രൊഫ. എം മുരളീധരൻ പെയിൻ ആൻഡ്‌ പാലിയേറ്റീവ്‌ സൊസൈറ്റി മാറണമെന്നാണ്‌ ആഗ്രഹമെന്ന്‌ വിജയലക്ഷ്‌മി പറഞ്ഞു. പ്രൊഫ. എം മുരളീധരന്റെ പേരിലുള്ള പെയിൻ ആൻഡ്‌ പാലിയേറ്റീവ്‌ സൊസൈറ്റി നിലവിൽ കിടപ്പ് രോഗികളെ വീട്ടിൽ ചെന്ന്‌ പരിചരിക്കുന്നുണ്ട്‌. ആവശ്യമായ മരുന്ന്‌, കട്ടിൽ, എയർ ബെഡ്‌, വീൽചെയർ, വാക്കർ, ഓക്‌സിജൻ എന്നിവ സ‍ൗജന്യമായി നൽകുന്നു. സൊസൈറ്റിക്ക്‌ രണ്ട്‌ ആംബുലൻസും ഒരു കാറും രോഗികളെ സന്ദര്‍ശിക്കാനായുണ്ട്‌. തൃശൂരിലെ രാഷ്‌ട്രീയ, സാംസ്‌കാരിക, അധ്യാപക മേഖലയിൽ നിറസാന്നിധ്യമായിരുന്നു പ്രൊഫ. എം മുരളീധരൻ. സെന്റ്‌ തോമസ്‌ കോളേജിൽ ഇംഗ്ലീഷ്‌ വിഭാഗം തലവനായി വിരമിച്ച അദ്ദേഹം സിപിഐ എം ജില്ലാ സെക്രട്ടറിയറ്റംഗമായിരുന്നു. 2025 ജൂലൈ 12 മുതൽ അയ്യന്തോൾ സഹകരണ ബാങ്കിന്റെ പുതൂർക്കരയിലുള്ള കെട്ടിടത്തിൽ വാടകയ്ക്കാണ്‌ പ്രൊഫ. എം മുരളീധരൻ പെയിൻ ആൻഡ്‌ പാലിയേറ്റീവ്‌ സൊസൈറ്റി പ്രവർത്തിക്കുന്നത്‌.