റോഡിലെ മണ്ണ് കടത്തി:
എൽഡിഎഫ് പ്രതിഷേധിച്ചു

ആളൂർ

പഞ്ചായത്തിന്റെ കൈവശമുള്ള റോഡിലെ മണ്ണ് പഞ്ചായത്തംഗം അനധികൃതമായി കടത്തിക്കൊണ്ടുപോയതിൽ പ്രതിഷേധിച്ച് എൽഡിഎഫ് നേതൃത്വത്തിൽ ആളൂർ പഞ്ചായത്ത് ഓഫീസിനു മുന്നിൽ പ്രതിഷേധിച്ചു. മണ്ണ്‌ കടത്തിയ 12-ാം വാർഡ് അംഗമായ കോൺഗ്രസ് നേതാവ്‌ ജോസ് കെ പയ്യപ്പിള്ളിക്കെതിരെ ശക്തമായ നിയമനടപടികൾ സ്വീകരിക്കണമെന്ന് ആവശ്യപ്പെട്ടായിരുന്നു പ്രതിഷേധം. പഞ്ചായത്ത് റോഡിലെ മണ്ണ് അനുമതിയില്ലാതെ സ്വന്തം പുരയിടത്തിലേക്ക് കടത്തുകയും നാട്ടുകാർ അന്വേഷിച്ചെത്തിയതോടെ മണ്ണ് നിരപ്പാക്കാൻ ശ്രമിക്കുകയുമായിരുന്നുവെന്ന് എൽഡിഎഫ് ആരോപിച്ചു. ​ പഞ്ചായത്ത് എൽഡിഎഫ് കൺവീനർ എം ബി ലത്തീഫ് ഉദ്ഘാടനം ചെയ്തു. ഐ എൻ ബാബു അധ്യക്ഷനായി. എം സി ഷാജു, എം സി സന്ദീപ്, പി കെ സദാനന്ദൻ, ബിന്ദു ഷാജു, സി യു ശശീന്ദ്രൻ, കെ സി സജയൻ എന്നിവർ സംസാരിച്ചു.