സദ്യയുണ്ണാനെത്തിയത്‌ അരലക്ഷം പേർ

ഗുരുവായൂര്‍

അഷ്ടമിരോഹിണി ദിനത്തില്‍ ഗുരുവായൂരിൽ സദ്യയുണ്ണാനെത്തിയത് അരലക്ഷത്തോളം പേര്‍. രാവിലെ ഒമ്പതിന് ശ്രീഗുരുവായൂരപ്പൻ ഓഡിറ്റോറിയത്തിൽ അഷ്ടമിരോഹിണി വിശേഷാൽ പ്രസാദ ഊട്ട് തുടങ്ങി. ദേവസ്വം ചെയർമാൻ എ വി ഗോപിനാഥ് ആദ്യസദ്യവിളന്പി. ക്ഷേത്രം തന്ത്രി പി സി ദിനേശൻ നമ്പൂതിരിപ്പാട് ദീപം തെളിച്ചു. തുടർന്ന് വിശ്വാസികളുടെ ഇലയിൽ വിഭവങ്ങൾ വിളമ്പി. ദേവസ്വം ഭരണസമിതി അംഗം എം യു ഷിനിജ, അഡ്മിനിസ്ട്രേറ്റർ എസ് ഹരിഗോപാൽ എന്നിവർ പ്രവർത്തനങ്ങൾക്ക് നേതൃത്വമേകി. തെക്കേനട ശ്രീ ഗുരുവായൂരപ്പൻ ഓഡിറ്റോറിയത്തിൽ വൈകിട്ട് 5.15 വരെയും അന്നലക്ഷ്മി ഹാളിലും അതിനോട് ചേർന്ന പന്തലിലും 6.30വരെയും പന്ത്രണ്ട് മണിക്കൂറിലധികം സമയവും പ്രസാദ ഊട്ട് തുടര്‍ന്നു.