നവകേരള സ്വപ്നപ്പിറവി തൃശൂരിൽ

.സി എ പ്രേമചന്ദ്രൻ
Published on Nov 01, 2026, 12:15 AM | 1 min read
തൃശൂർ
കേരളപ്പിറവിയുടെ മുന്നോടിയായി നവകേരള സ്വപ്നങ്ങൾ പിറവിയെടുത്തത് തൃശൂരിൽ. ഐക്യകേരള സങ്കൽപ്പവും ഭാവി കേരളത്തിന്റെ രൂപ രേഖയും തയ്യാറാക്കുന്ന കമ്യൂണിസ്റ്റ് പാർടിയുടെ പ്രമേയം പിറന്നത് തൃശൂരിലാണ്. 1956 ജൂൺ 22, 23, 24 തീയതികളിലായിരുന്നു ചരിത്രം സൃഷ്ടിച്ച ആ പ്രത്യേക സംസ്ഥാന സമ്മേളനം. ഏഴ് പതിറ്റാണ്ട് മുന്നേ പിറന്ന ആ ആശയത്തിന്റെ ശക്തിയാണ് കേരളത്തെ മുന്നോട്ട് നയിച്ചത്. ഇ എം എസിന്റെ അധ്യക്ഷതയിൽ ചേർന്ന സമ്മേളനത്തിൽ പാർടി സംസ്ഥാന സെക്രട്ടറിയായിരുന്ന എം എൻ ഗോവിന്ദൻനായരാണ് പ്രമേയം അവതരിപ്പിച്ചത്. ‘1947നുശേഷമുള്ള കോൺഗ്രസ് ഗവൺമെന്റുകളുടെ ജനദ്രോഹനയങ്ങൾക്കെതിരെ രാജ്യസ്നേഹികളായ മലയാളികൾ ഒന്നിച്ച് അണിനിരക്കണം. മിനിമം പരിപാടി നടപ്പാക്കാൻ കെൽപ്പുള്ള ഉറച്ച സർക്കാർ വേണം. അതിനായി ഇടതുപക്ഷപാർടികൾ, ജനാധിപത്യ വാദികളായ വ്യക്തികൾ, കോൺഗ്രസിന്റെ പിന്തിരിപ്പൻ നയങ്ങൾക്കെതിരായി പോരാടാൻ തയ്യാറുള്ള കോൺഗ്രസുകാർ എന്നിങ്ങനെ സഖ്യം രൂപീകരിച്ച് നിയമസഭയിൽ ഭൂരിപക്ഷം നേടി സർക്കാരുണ്ടാക്കാൻ സാഹചര്യം സൃഷ്ടിക്കണം. അതിനായി പാർടി മുന്നിൽ നിൽക്കും.’ ഇതായിരുന്നു പ്രമേയത്തിന്റെ കാതൽ. ഇ എം എസ് എഴുതിയ ‘ഒന്നേകാൽക്കോടി മലയാളികൾ' എന്ന പുസ്തകം ഐക്യകേരള ആശയത്തിന് കരുത്തുപകർന്നു. ഈ പുസ്തകമാണ് പിന്നീട് ‘കേരളം മലയാളികളുടെ മാതൃഭൂമി' എന്ന പേരിൽ പുനപ്രസിദ്ധീകരിച്ചത്. നാടിന്റെ വികസനവുമായി ബന്ധപ്പെട്ട പ്രമേയം കേരളമാകെ അലയടിച്ചു. 1957ലെ തെരഞ്ഞെടുപ്പിൽ ഇ എം എസിന്റെ നേതൃത്വത്തിൽ ഇന്ത്യയിലാദ്യമായി കമ്യൂണിസ്റ്റ് പാർടി അധികാരത്തിൽ വന്നു. പാർടി പ്രമേയം അടിസ്ഥാനമാക്കി കാർഷിക പരിഷ്കാരം, സാർവത്രിക വിദ്യാഭ്യാസം, ആരോഗ്യരംഗത്തെ പുരോഗതി എന്നിങ്ങനെ നവകേരള സ്വപ്നങ്ങൾ യാഥാർഥ്യമായി. വിമോചന സമരമുൾപ്പടെ ജനാധിപത്യ വിരുദ്ധ മാർഗങ്ങളിലൂടെ ആ സർക്കാരിനെ തകർത്തെങ്കിലും പിന്നീട് വന്ന ഇടതുപക്ഷ സർക്കാരുകൾക്കെല്ലാം മാർഗദീപമായി ഇ എം എസ് സർക്കാർ വർത്തിച്ചു. ആദ്യ ഇ എം എസ് സർക്കാരിൽ തൃശൂരിൽനിന്ന് നാലു മന്ത്രിമാർ ഉണ്ടായിരുന്നുവെന്നതും ശ്രദ്ധേയം. സി അച്യുതമേനോൻ ( ധനകാര്യം), പ്രൊഫ. ജോസഫ് മുണ്ടശേരി ( വിദ്യാഭ്യാസം), ഡോ. എ ആർ മേനോൻ ( ആരോഗ്യം), പി കെ ചാത്തൻ മാസ്റ്റർ ( പട്ടിക വിഭാഗ ക്ഷേമം) എന്നിവരാണവർ.








0 comments