ജോലിസ്ഥലത്ത്​ പീഡനം 
നേരിടുന്നതായി ജീവനക്കാരി

തൃശൂർ

കോൺഗ്രസ്​ ഭരിക്കുന്ന ഒല്ലൂർ ഭവനനിർമാണ സഹകരണ സംഘത്തിൽ അഴിമതി നടക്കുന്നതായും ജോലിസ്ഥലത്ത്​ പീഡനം നേരിടുന്നതായും ജീവനക്കാരി ബിന്ദു വാർത്താ സമ്മേളനത്തിൽ ആരോപിച്ചു. കോൺഗ്രസ്​ ഒല്ലൂർ ബ്ലോക്ക്​ വൈസ്​ പ്രസിഡന്റും സംഘം പ്രസിഡന്റുമായ ശശി പോട്ടയിൽ, സെക്രട്ടറി നിഷ അഭിഷ്​, യു കെ സദാനന്ദൻ എന്നിവരാണ്​​ പലതരത്തിൽ പീഡിപ്പിച്ചതെന്ന്​ ബിന്ദു പറഞ്ഞു​. ഇതുസംബന്ധിച്ച് ഒല്ലൂർ പൊലീസിൽ നൽകിയ പരാതിയിൽ കേസെടുത്തിട്ടുണ്ട്​. 12 വർഷമായി സംഘത്തിൽ ജോലിചെയ്യുന്നു. സംഘത്തിലെ അഴിമതിയും പീഡനവും അന്വേഷിക്കണമെന്ന്​ ആവശ്യപ്പെട്ട്​ പരാതി നൽകിയതിനെത്തുടർന്ന്​ ജോലിയിൽനിന്ന്​ അന്യായമായി സസ്​പെൻഡ്​ ചെയ്​തു. ​ ഇക്കാര്യം ചൂണ്ടിക്കാട്ടി സഹകരണ ജോ. രജിസ്​ട്രാർക്ക്​​ പരാതി നൽകിയിട്ടുണ്ട്. വായ്​പാതട്ടിപ്പിന്​ തന്നെ ഇരയാക്കിയതോടെ വായ്​പക്കാരന്റെ കുടിശ്ശികയിലേക്ക്​ ശമ്പളത്തിൽനിന്ന്​ തുക ഇ‍ൗടാക്കുന്നു. അറ്റൻഡർ സ്ഥിരനിയമനത്തിനായി രണ്ട്​ ലക്ഷം രൂപ നൽകി. കേസ്​ പിൻവലിക്കാൻ പറഞ്ഞ്​ നിരന്തര ഭീഷണിയുണ്ട്​. നിലവിൽ ജീവന്​ ഭീഷണിയുള്ള അവസ്ഥയാണ്​. രാഷ്​ട്രീയ സ്വാധീനം ഉപയോഗിച്ച്​ കേസ്​ അട്ടിമറിക്കാൻ നീക്കംനടക്കുന്നതായും ബിന്ദു വാർത്താ സമ്മേളനത്തിൽ ആരോപിച്ചു.