നരിയമ്പാറ ശബരിഗിരി കോളേജ് പ്രവർത്തിച്ചിരുന്ന ഭൂമി ദേവസ്വം ബോർഡ് പ്രസിഡന്റ് സന്ദർശിച്ചു

ഇടുക്കി

നരിയമ്പാറ ദേവസ്വം ബോർഡ്‌ ശബരിഗിരി കോളേജ് പ്രവർത്തിച്ചിരുന്ന സ്ഥലം തിരുവിതാംകൂർ ദേവസ്വം ബോർഡ് പ്രസിഡന്റ് അഡ്വ. പി എസ് പ്രശാന്ത് സന്ദർശിച്ചു. 1968ലായിരുന്നു കാഞ്ചിയാറിൽ ദേവസ്വം ബോർഡിന് കീഴിൽ ശബരിഗിരി കോളേജ് പ്രവർത്തനം ആരംഭിച്ചത്. 1978വരെ പ്രവർത്തിച്ചു. ശേഷം 40ലേറെ ഏക്കർ കാടുകയറിയ നിലയിലാണ്. തുടർന്നാണ് ദേവസ്വം ബോർഡ് പ്രസിഡന്റ് സന്ദർശിച്ചത്. പ്രകൃതിസുന്ദരമായ സ്ഥലമാണ് കോളേജിന്റെ വസ്‍തുവെന്നും അയ്യപ്പ വിശ്വാസികള്‍ക്കും പൊതുജനങ്ങൾക്കും ഉപകരിക്കുന്ന രീതിയില്‍ പദ്ധതികൾ നടപ്പാക്കാൻ ദേവസ്വം ബോർഡ് ആലോചിക്കുന്നയതായും പി എസ് പ്രശാന്ത് പറഞ്ഞു. വസ്തുവിൽ കൈയേറ്റങ്ങളുണ്ടോയെന്ന് പരിശോധിക്കാൻ റവന്യൂ വിഭാഗത്തിന് നിർദ്ദേശം നൽകി. ഉപയോഗശൂന്യമായതും അന്യാധീനപ്പെട്ടതുമായ ദേവസ്വം ബോർഡ് സ്വത്തുവകകൾ കണ്ടെത്തി ദേവസ്വം ആസ്‍തിയിലേക്ക് മുതൽക്കൂട്ടുന്ന പദ്ധതിയുടെ ഭാഗമായാണ് സന്ദര്‍ശനം.