ആറ്റിങ്ങലിൽ എം പ്രദീപ് ചെയർപേഴ്സൺ

ആറ്റിങ്ങൽ

ആറ്റിങ്ങൽ നഗരസഭാ ചെയർപേഴ്സണായി എം പ്രദീപിനെയും വൈസ് ചെയർപേഴ്സണായി ആർ എസ് രേഖയെയും തെരഞ്ഞെടുത്തു. തച്ചൂർകുന്ന് വാർഡിൽനിന്നാണ് സിപിഐ എം സ്ഥാനാർഥിയായ എം പ്രദീപിനെ തെരഞ്ഞെടുത്തത്. വിളയിൽമൂല വാർഡിൽനിന്നാണ് സിപിഐ എം സ്ഥാനാർഥി ആർ എസ് രേഖയെ തെരഞ്ഞെടുത്തത്. 32 അംഗ നഗരസഭാ കൗൺസിലിൽ എൽഡിഎഫ് 16, യുഡിഎഫ് 7, എൻഡിഎ 7, സ്വതന്ത്രർ 2 എന്നിങ്ങനെയായിരുന്നു കക്ഷിനില. ചെയർമാൻ തെരഞ്ഞെടുപ്പിൽ എൽഡിഎഫ് സ്ഥാനാർഥിയായി മത്സരിച്ച എം പ്രദീപിന് രണ്ട് സ്വതന്ത്രരുടേതടക്കം 18 വോട്ടുകൾ ലഭിച്ചു. യുഡിഎഫ് സ്ഥാനാർഥി പി എസ് കിരണിനും എൻഡിഎ സ്ഥാനാർഥി എസ് സന്തോഷിനും ഏഴുവീതം വോട്ടുകൾ ലഭിച്ചു. വൈസ് ചെയർപേഴ്സൺ തെരഞ്ഞെടുപ്പിലും രണ്ട് സ്വതന്ത്രരും എൽഡിഎഫ് സ്ഥാനാർഥി ആർ എസ് രേഖയെ പിന്തുണച്ചതോടെ 18 വോട്ട് നേടി. യുഡിഎഫ് സ്ഥാനാർഥിയായി കോസ്മോഗാർഡൻ വാർഡ്‌ അംഗം മല്ലികയും എൻഡിഎ സ്ഥാനാർഥിയായി പൂവൻപാറ വാർഡ്‌ അംഗം ദീപ രാജേഷുമാണ്‌ മത്സരിച്ചത്. ഇരുവർക്കും ഏഴുവീതം വോട്ടുകൾ ലഭിച്ചു.