പാറശാല–പരുത്തിപ്പള്ളി പാത പൂർത്തിയായി

​വെള്ളറട

പാറശാല മണ്ഡലത്തിന്റെ ഗതാഗതസ്വപ്‌നങ്ങൾക്ക് ചിറകുനൽകിക്കൊണ്ട് പാറശാല–പരുത്തിപ്പള്ളി മലയോര ഹൈവേയുടെ നവീകരണം പൂർത്തിയായി. കിഫ്ബിവഴി 138 കോടി രൂപ ചെലവഴിച്ചാണ് നിർമാണം. പാറശാലമുതൽ കുടപ്പനമൂടുവരെയുള്ള 15.5 കിലോമീറ്റർ ദൂരവും തുടർന്നുള്ള പരുത്തിപ്പള്ളിവരെയുള്ള ഭാഗവും യാത്രക്കാർക്കായി തുറന്നുനൽകിയിരിക്കുകയാണ്. ​അടിമുടി മാറി പാത നേരത്തേ 5.5 മീറ്റർമാത്രം വീതിയുണ്ടായിരുന്ന പാത, പലയിടങ്ങളിലും ഗതാഗതക്കുരുക്കിനും അപകടങ്ങൾക്കും കാരണമായിരുന്നു. പുതിയ പദ്ധതിപ്രകാരം റോഡിന്റെ വീതി 12 മുതൽ 13.5 മീറ്റർവരെയായി വർധിപ്പിച്ചു. ഇതിൽ ഒന്പതു മീറ്റർ വീതിയിലാണ് ആധുനികരീതിയിലുള്ള ടാറിങ് നിർവഹിച്ചിരിക്കുന്നത്. ​വെല്ലുവിളികളെ മറികടന്ന്‌ ജനകീയ ഇടപെടൽ സ്ഥലം ഏറ്റെടുക്കുന്നതുമായി ബന്ധപ്പെട്ട കടന്പകൾ സി കെ ഹരീന്ദ്രൻ എംഎൽഎ നേരിട്ട് ഇടപെട്ട് പരിഹരിക്കുകയായിരുന്നു. അദ്ദേഹം ഭൂ ഉടമകളുമായി നടത്തിയ ചർച്ച ഫലംകണ്ടു. ​