print edition കവർച്ചക്കേസിൽ ദമ്പതികളും മകനും പിടിയിൽ

ആലപ്പുഴ: തിരുവനന്തപുരം പോത്തൻകോട് ഗൃഹനാഥന്‌ മദ്യം നൽകി അബോധാവസ്ഥയിലാക്കി 10 ലക്ഷം രൂപയു​ടെ സ്വത്തുക്കൾ കവർന്ന കേസിൽ ദമ്പതികളും മകനുമടക്കം മൂന്നുപേർ ആലപ്പുഴയിൽ പിടിയിൽ. നെയ്യാറ്റിൻകര ആറാലൂംമൂട്​ മേലേപുത്തൻവീട്​ തടികോട്ടുകോണം പ്രകാശ്​ (സുനിൽ- – 40), ഭാര്യ ദീപ (42), മകൻ അഖിൽ (23) എന്നിവരെയാണ് കലവൂരിലെ ആരാധനാലയത്തിൽനിന്ന്‌ പൊലീസ്​ പിടികൂടിയത്​.

ഞായർ​ വൈകിട്ട് 5.30ന്‌ കടകംപള്ളി ആനയറ ​ഈറോഡ്​ വീട്ടിലാണ്‌ സംഭവം. വയോധികനെ അബോധവസ്ഥയിലാക്കിയ ശേഷം സ്വർണമാല, മോതിരം, കൈചെയിൻ, 8000 രൂപ, എടിഎം കാർഡ്, പാൻകാർഡ്, ഡ്രൈവിങ് ലൈസൻസ്, എക്‌സ്‌-സർവീസ് കാർഡ് എന്നിവയാണ് കവർ
ന്നത്. ഒളിവിൽ പോയ പ്രതികൾ ആലപ്പുഴ കലവൂരിലെ ആരാധനാലയത്തിൽ കഴിയുന്നതായി ജില്ലാ പൊലീസ്​ മേധാവി വിഷ്‌ണു പ്രദീപിന് ലഭിച്ച വിവരത്തെത്തുടർന്നാണ് പിടികൂടിയത്‌.

ആലപ്പുഴ ഡിവൈഎസ്‌പി മുകേഷിന്റെ നിർദേശപ്രകാരം ഇൻസ്‌പെക്‌ടർ വിനീഷിന്റെ നേതൃത്വത്തിൽ എസ്ഐ മുജീബ്, എഎസ്ഐ ഉല്ലാസ്, വിഷ്‌ണു, വിപിൻദാസ്, ശ്യാം, ബിജു, ബിനോയ് എന്നിവരടങ്ങിയ പ്രത്യേക സംഘമാണ് ഇവരെ പിടികൂടിയത്. പ്രതികളെ മണ്ണഞ്ചേരി പൊലീസിന്‌​ കൈമാറി. തുടർനടപടികൾക്കായി ഇവരെ തിരുവനന്തപുരം പൊലീസിന്​ കൈമാറും.