ഒറ്റൂരിൽ അതിരുകളില്ലാ വികസനം

വർക്കല

മാലിന്യ സംസ്കരണത്തിൽ സംസ്ഥാനത്തുതന്നെ വലിയ ശ്രദ്ധനേടിയ പഞ്ചായത്താണ് ഒറ്റൂർ. പ്രവര്‍ത്തന മികവില്‍ ഏറ്റവും മികച്ച ഹരിത കർമസേനയും മാലിന്യമുക്ത പ്രവർത്തനങ്ങളിൽ ജില്ലയിലെ മികച്ച പഞ്ചായത്തുമായി. 1979 ൽ രൂപീകൃതമായ പഞ്ചായത്ത് ഇടതുപക്ഷത്തോടൊപ്പമാണ്. മുമ്പ് മണമ്പൂർ പഞ്ചായത്തിന്റെ ഭാഗമായിരുന്നു. കയർ പിരിയും നെയ്ത്തും പഞ്ചായത്തിന്റെ പരമ്പരാഗത വ്യവസായമായിരുന്നു. പിന്നീട് കഴിഞ്ഞ 10 വർഷത്തെ എൽഡിഎഫ് ഭരണം എല്ലാ മേഖലകളിലും വലിയ വികസനമാണ് നാടിന് സമ്മാനിച്ചത്. ജനകീയ ഇടപെടലോടെയായിരുന്നു മുന്നേറ്റം. ​148 ഭവന രഹിതര്‍ ലൈഫിൽ പദ്ധതിയിലൂടെ വീടൊരുക്കി. ഏക്കര്‍ കണക്കിന് തരിശുനിലം ഏറ്റെടുത്ത് പൂർണമായും കൃഷി യോഗ്യമാക്കി. പഞ്ചായത്തിലുടനീളം എൽഇഡി ബൾബ് നിർമാണം, ഇനോക്കുലം നിർമാണ യൂണിറ്റ്, ഇവന്റ് മാനേജ്‌മെന്റ് തുടങ്ങി നൂതനമായ സംരംഭങ്ങൾ ആരംഭിച്ചു. ഇന്റർനാഷണൽ നിലവാരമുള്ള വി എസ് അച്യുതാനന്ദൻ ഇൻഡോർ സ്റ്റേഡിയം, ആധുനിക സൗകര്യത്തിലുള്ള സ്കൂ‌ൾ കെട്ടിടങ്ങൾ, മനസ്സോടിത്തിരി മണ്ണ് പദ്ധതിയിലൂടെ ഭൂമിയില്ലാത്തവര്‍ക്ക് ഭൂമി നല്‍കല്‍ തുടങ്ങിയവ അഭിമാന നേട്ടമാണ്. സ്‌മാർട്ട് അങ്കണവാടി, വിദ്യാർഥികൾക്ക് പഠനമുറി, കിണർ റീചാർജ്, ഭിന്നശേഷിക്കാർക്ക് ധനസഹായം, ശിശു സംരക്ഷണം പ്രത്യേക പരിഗണന, കേരഗ്രാമം പദ്ധതി, അർഹതപ്പെട്ടവർക്കെല്ലാം ക്ഷേമ പെൻഷൻ, പുതിയ സംരംഭങ്ങൾക്ക് സാമ്പത്തിക സഹായം എന്നിവയും നല്‍കി. ​കാർഷിക മേഖലയിൽ കൃഷിയെ പ്രോത്സാഹിപ്പിച്ച് ശ്രദ്ധേയമായ നേട്ടം കൈവരിക്കാനായി. തരിശു പാടങ്ങൾ ഏറ്റെടുത്ത് വിവിധ കൃഷിയിറക്കി. സൗജന്യമായി സങ്കരയിനം തൈകളും ഗുണമേന്മയുള്ള ഫലവൃക്ഷങ്ങളും കിഴങ്ങു വർഗങ്ങളുടെ കിറ്റുകളും നല്‍കി. പുതുതായി 25 ഏക്കറിൽ കൃഷി വ്യാപിപ്പിച്ചു. വീട്ടമ്മമാരെ കൃഷിയിലേക്ക് അടുപ്പിച്ച് തൈകളും വിത്തുകളും നല്‍കി. കൈപ്പള്ളി കൃഷിക്കൂട്ടം, ഗ്രാമശ്രീ കൃഷിക്കൂട്ടം, അസ്ത്ര കൃഷിക്കൂട്ടം എന്നിവ രൂപീകരിച്ചു. വെള്ളായണി കാർഷിക കോളേജുമായി സഹകരിച്ച് ഹരിത കർമസേനയ്‌ക്ക് ഇനാക്കുലം, മണ്ണിര കമ്പോസ്റ്റ് നിര്‍മാണത്തില്‍ പരിശീലനം നല്‍കി സേനയെ പുതിയ സംരംഭത്തിലേക്കുനയിച്ചു. വി ഹെൽപ്‌ ഇവന്റ് മാനേജ്മെന്റ് ഗ്രൂപ്പിലൂടെ നിരോധിക്കപ്പെട്ട പാത്രങ്ങൾ, ഗ്ലാസുകൾ എന്നിവയ്ക്ക് പകരമായി സ്റ്റീൽ, പിഞ്ഞാണപ്പാത്രങ്ങൾ, ഗ്ലാസുകൾ എന്നിവ വാടകയ്ക്ക് നൽകുന്നതടക്കം ഹരിത കർമസേനയ്‌ക്ക് മൂന്ന് ശ്രദ്ധേയമായ സംരംഭങ്ങൾ ആരംഭിക്കാനായി. ഇവയുടെ മികവ് ജില്ലയിലാകമാനം ശ്രദ്ധപിടിച്ചുപറ്റാനും സാധിച്ചു.