ശാന്തിഗ്രാമിനെ 'ബിൽഡ്' ചെയ്യാൻ ട്രെയിനർ ബ്രോ

ടി വി സുരേഷ്
Published on Dec 01, 2025, 12:15 AM | 1 min read
മഞ്ചേരി
ശരീരത്തിന്റെ കരുത്തിനൊപ്പം മനസ്സിന്റെ നന്മയും ചേർത്തുവച്ച് എ വി പ്രജിത്ത് ജനങ്ങളോട് ചോദിക്കുന്നത് ഒരവസരമാണ്. നല്ലൊരു നാടിനെ ബിൽഡ് ചെയ്തെടുക്കാനുള്ള അവസരം. മഞ്ചേരി നഗരസഭ 36-ാം വാർഡ് ശാന്തിഗ്രാമിലെ എൽഡിഎഫ് സ്ഥാനാർഥിയാണ് ജിം ട്രെയിനർ ബ്രോ പ്രജിത്ത്. ജില്ലാ സ്പോർട്സ് പ്രമോഷൻ അക്കാദമിയിലെ ജിം ട്രെയിനറായ പ്രജിത്തിന് ബോഡി ബിൽഡിങ് വെറുമൊരു വാക്കല്ല. ജീവിതശൈലിയാണ്. കഴിഞ്ഞ രണ്ട് പതിറ്റാണ്ടിനിടെ പ്രജിത്തിന്റെ ശിക്ഷണത്തിൽ ആരോഗ്യമുള്ള ശരീരവും ആത്മവിശ്വാസമുള്ള മനസ്സുമായി ജീവിതത്തിലേക്ക് നടന്നുകയറിയത് നൂറുകണക്കിന് യുവാക്കളാണ്. ചിട്ടയായ പരിശീലനത്തിലൂടെയാണ് പ്രജിത്ത് അക്കാദമിയിലെ കായിക താരങ്ങളെ ആരോഗ്യവും ആത്മവിശ്വാസവും ഉള്ളവരാക്കി മാറ്റുന്നത്. ഇതിനിടെ ജില്ലാ -സംസ്ഥാന ബോഡി ബിൽഡിങ് വേദികളിലും തിളങ്ങി. നിലവിൽ ജില്ലാ ബോക്സിങ് അസോസിയേഷൻ ജോയിന്റ് സെക്രട്ടറിയാണ്. സന്നദ്ധ സേവന രംഗത്തും നാട്ടുകാരുടെ പ്രിയപ്പെട്ടവനാണ് 'ട്രെയിനർ ബ്രോ'. കോവിഡ് മഹാമാരി വീടിനുള്ളിൽ തളച്ചിട്ടപ്പോഴും പ്രളയകാലത്തും സഹായഹസ്തവുമായി പ്രജിത്ത് ഓടിയെത്തി. ഡിവൈഎഫ്ഐയുടെ സന്നദ്ധ പ്രവർത്തകർക്കൊപ്പം ജനസേവനത്തിന്റെ മുൻനിരയിൽനിന്നു. സിപിഐ എം ശാന്തിഗ്രാം ബ്രാഞ്ച് അംഗമാണ്.









0 comments