ചെറുകാട് സ്മാരക ഗ്രന്ഥാലയം ഇന്ന് നാടിന് സമര്‍പ്പിക്കും

മലപ്പുറം

സിപിഐ എം ജില്ലാ കമ്മിറ്റി ഓഫീസായ ഇ എം എസ് മന്ദിരത്തില്‍ ഒരുക്കിയ ചെറുകാട് സ്മാരക റഫറന്‍സ് ഗ്രന്ഥാലയം വ്യാഴാഴ്ച നാടിന് സമര്‍പ്പിക്കും. പൊതുജനങ്ങള്‍ക്കും ഗവേഷകര്‍ക്കും ഉപയോഗിക്കാവുന്ന അയ്യായിരത്തോളം ആധികാരിക ഗ്രന്ഥങ്ങളുടെ ശേഖരം ഇവിടെയുണ്ട്. കാഴ്ചപരിമിതര്‍ക്ക് ഉപയോഗിക്കാവുന്ന പുസ്തകങ്ങളും ലഭ്യമാണ്. രാഷ്ട്രീയ, സാമൂഹ്യ, സാംസ്കാരിക രംഗങ്ങളിലെ നിരവധിയാളുകളാണ് പുസ്തകങ്ങള്‍ സംഭാവനചെയ്തത്. അന്തരിച്ച നേതാക്കളുടെയും സാംസ്കാരിക നായകന്മാരുടെയും പുസ്തകശേഖരം കുടുംബാംഗങ്ങള്‍ കൈമാറി.

പകല്‍ രണ്ടിന് സിപിഐ എം പൊളിറ്റ്ബ്യൂറോ അംഗം എ വിജയരാഘവന്‍ ഗ്രന്ഥാലയം ഉദ്ഘാടനംചെയ്യും. മുതിര്‍ന്ന നേതാക്കളായ പാലോളി മുഹമ്മദ്കുട്ടി, ടി കെ ഹംസ, പി പി വാസുദേവന്‍, മുന്‍ മന്ത്രി കെ ടി ജലീല്‍, മുന്‍ എംഎല്‍എ പി നന്ദകുമാര്‍, ദേശാഭിമാനി വാരിക പത്രാധിപര്‍ കെ പി മോഹനന്‍, പ്രഭാഷകരായ പ്രൊഫ. എം എം നാരായണന്‍, കെ ഇ എന്‍ കുഞ്ഞഹമ്മദ് എന്നിവര്‍ പങ്കെടുക്കും.