പന്തല്ലൂരിന്‌ പറയാനുണ്ട്‌ കൊടിയ പീഡനങ്ങളുടെ ചരിത്രം

എടക്കര

പരിസ്ഥിതിലോല പ്രദേശമായി പ്രഖ്യാപിച്ച ഗൂഡല്ലൂർ പന്തല്ലൂർ താലൂക്കിൽ നിലനിൽക്കുന്നത് ഫോറസ്റ്റ് രാജ്. കുടിയിറക്കിനെ പ്രതിരോധിച്ചതിന്‌ 1981ൽ ജയിലിൽ കിടന്നത് 455 കർഷകർ.

എങ്ങും പരിശോധനകൾ, പീഡനങ്ങൾ, വഴിതടയൽ, നിർമാണം തടയൽ ഫോറസ്റ്റ് ഉദ്യോഗരുടെ നേതൃത്വത്തിൽ നടക്കുന്നത്‌ ജനജീവിതം ദുസ്സഹമാക്കുന്ന നടപടികൾമാത്രം. ബെൽറ്റ് ഏരിയയായി പ്രഖ്യാപിച്ച സ്ഥലത്തേക്ക് തമിഴ്നാട് സർക്കാർ പ്രത്യേകം പരിശീലനം നൽകിയ ഫോറസ്റ്റ് ഉദ്യോഗസ്ഥകരെയാണ് നിയമിക്കുന്നത്. 70 വർഷം കൈവശംവച്ചും കൃഷിചെയ്തുംവരുന്ന കർഷക ഭൂമിക്ക് പട്ടയമില്ല.

ഒരുഭാഗത്ത്‌ കാട്ടാനയും കടവയും പുലിയും കാട്ടുപോത്തുമുൾപ്പെടെ വന്യജീവികളെ ഭയക്കണം. മറുഭാഗത്ത് കുടിയിറക്കൽ ഭീഷണിയും. ഒരായുസ് മുഴുവൻ അധ്വാനിച്ചുണ്ടാക്കിയ കൃഷിയിടമാണ് ഒരുദിനത്തിൽ തകർത്ത് വീടിന് തീയിട്ട് കുടിയിറക്കാൻ വരാറുള്ളത്. വനം വകുപ്പ് ആവശ്യപ്പെട്ടാൽ തമിഴ്നാട് പൊലീസും കുടിയിറക്കിനെത്തും.

കുടിയിറക്കിനെതിരെ പ്രക്ഷോഭം നടത്തിയ 455 പേരെയാണ് അറസ്റ്റ് ചെയ്ത് കോയമ്പത്തൂർ സെൻട്രൽ ജയിലിൽ അടച്ചത്. ഓവാലി, ചെളിവയൽ, അയ്യംകൊല്ലി, മച്ചിക്കൊല്ലി, മണ്ണുപൊയിൽ, എരുമാട്, പുത്തൂർ വയൽ പ്രദേശത്തെ കർഷകരെയാണ് ജയിലിലടച്ചത്. 15 ദിവസം കഴിഞ്ഞാണ് ജാമ്യം ലഭിച്ചത്. ഈ സമയത്ത് അഞ്ച് കർഷകർ ആത്മഹത്യചെയ്‌തു. പീഡനമുറകളുടെ ഭീതിപ്പെടുത്തുന്ന ചരിത്രമാണ് ഗൂഡല്ലൂർ, പന്തല്ലൂർ താലൂക്കിലെ കർഷക കുടുംബങ്ങൾക്ക് പറയാനുള്ളത്.