ആറാടി നേടി ആൻമേരിയും അജയ് കൃഷ്‌ണയും

ആലപ്പുഴ
നെഹ്റുട്രോഫി വള്ളംകളിക്ക് മുന്നോടിയായി പബ്ലിസിറ്റി കമ്മിറ്റി സംഘടിപ്പിച്ച വള്ളംകളി കമന്ററി മത്സരം ജില്ലാ പഞ്ചായത്ത് മിനി കോൺഫറൻസ് ഹാളിൽ ഡെപ്യൂട്ടി സ്‌പീക്കർ ഷാനിമോൾ ഉസ്‌മാൻ ഉദ്ഘാടനംചെയ്‌തു. കഴിഞ്ഞവർഷത്തെ ഫൈനൽ മത്സരത്തെ ആസ്‌പദമാക്കിയാണ് മത്സരാർഥികൾ കമന്ററി അവതരിപ്പിച്ചത്. ഹൈസ്‌കൂൾ-ഹയർസെക്കൻഡറി, പൊതുവിഭാഗം എന്നിങ്ങനെ രണ്ട് വിഭാഗങ്ങളിലായിരുന്നു മത്സരങ്ങൾ. മത്സരവിജയികൾ: ഹൈസ്‌കൂൾ ഹയർസെക്കൻഡറി വിഭാഗം: ഒന്നാംസ്ഥാനം: ആൻമേരി ബ്രിട്ടോ (സെന്റ് അലോഷ്യസ് എച്ച്എസ്എസ് – പുന്നപ്ര), രണ്ടാംസ്ഥാനം: സി ആർ ബ്രൂട്ടോ (എസ്എൻഡിപി എച്ച്എസ്എസ് – കുട്ടമംഗലം), ജൂറിയുടെ പ്രത്യേക പരാമർശം: മുഹമ്മദ് യാസിൻ (പ്രയാർ ആർവിഎസ്എം എച്ച്എസ്എസ്). പൊതുവിഭാഗം: ഒന്നാംസ്ഥാനം: എസ് അജയ് കൃഷ്‌ണ (കല്ലുപുരയ്‌ക്കൽ – ഹരിപ്പാട്), രണ്ടാംസ്ഥാനം: ഷാഹിം മഹ്മ്മുദ് (മാഴ്സ് വില്ല – പുന്നപ്ര), പ്രോത്സാഹന സമ്മാനം: അഥീന സോണി, സന്തോഷ് തോമസ്, റോണി ജേക്കബ്, ജോൺ ബോസ്‌കോ. ഓരോ വിഭാഗത്തിലും ഒന്നും രണ്ടും  സ്ഥാനം നേടിയവർക്ക് ആലപ്പുഴ കൈചൂണ്ടി ജങ്ഷനിലെ അലീന ജ്വല്ലറി സ്വർണനാണയം സമ്മാനമായി നൽകും. ​എ ആർ ശുഐബിന് ആദരം ​നെഹ്‌റുട്രോഫി വള്ളംകളിയുടെ ഭാഗ്യചിഹ്നമായ വേഴാമ്പലിന് ‘വേഴു' എന്ന പേര് നിർദേശിച്ച തിരുവമ്പാടി നടുവിലെപ്പറമ്പ് എ ആർ ശുഐബിന് മുല്ലയ്‌ക്കൽ നൂർ ജ്വല്ലറി നൽകുന്ന സ്വർണനാണയം ചടങ്ങിൽ ഡെപ്യൂട്ടി സ്‌പീക്കർ സമ്മാനിച്ചു. കലക്‌ടർ ഷാജി വി നായർ ചടങ്ങിൽ അധ്യക്ഷനായി. മുൻ എംഎൽഎ എ എ ഷുക്കൂർ, ജില്ലാ ഇൻഫർമേഷൻ ഓഫീസർ കെ എസ് സുമേഷ്, നഗരസഭാ അംഗങ്ങളായ ബെന്നി ജോസഫ്, ബിജി ശങ്കർ, പബ്ലിസിറ്റി കമ്മിറ്റി അംഗങ്ങളായ സി പ്രദീപ്, എ എൻ പുരം ശിവകുമാർ, ഡോ. നെടുമുടി ഹരികുമാർ, ടി ആർ ആസാദ്, കെ നാസർ, രമേശൻ ചെമ്മാപറമ്പിൽ, അബ്‌ദുൾ സലാം ലബ്ബ, പി കെ ബൈജു, എ കബീർ തുടങ്ങിയവരും പങ്കെടുത്തു. പ്രൊഫ. ചെറിയാൻ അലക്‌സാണ്ടർ, ഹരികുമാർ വാലേത്ത്, വിനോദ് കാരിച്ചാൽ എന്നിവരായിരുന്നു വിധികർത്താക്കൾ.