വിവരങ്ങൾ കിട്ടിയില്ലെങ്കിൽ 
സ്ഥലംവിട്ടവരായി കണക്കാക്കണം

ആലപ്പുഴ

വോട്ടർപ്പട്ടിക തീവ്ര പുനപരിശോധനയുടെ (എസ്ഐആർ) ഡിജിറ്റൈസേഷൻ 100 ശതമാനം പൂർത്തിയാക്കാൻ എളുപ്പവഴിക്ക്‌ കടുംവെട്ടുമായി തെരഞ്ഞെടുപ്പ്‌ കമീഷൻ. എന്യൂമറേഷന്‍ ഫോം കൈപ്പറ്റാത്തവരുടെയും പൂരിപ്പിച്ച്‌ ഫോം തിരികെ നൽകാത്തവരുടെയും വിവരങ്ങൾ, ആപ്പിൽ കണ്ടെത്താൻ കഴിയാത്തവരുടെ വിഭാഗത്തിൽ സ്ഥിരമായി താമസം മാറിയവരെന്ന്‌ രേഖപ്പെടുത്തി എസ്‌ഐആർ പൂർത്തിയാക്കാനാണ്‌ ബിഎൽഒമാർക്ക്‌ പുതിയ നിർദേശംനൽകിയത്‌. താൽകാലികമായി വീടുമാറിയവർ, മറ്റിടങ്ങളിൽ ജോലിചെയ്യുന്നവർ, വീട്ടിലില്ലാത്തവർ, മാസങ്ങളായി ആശുപത്രിയിൽ തുടരുന്നവർ, ബന്ധുവീട്ടിൽ കഴിയുന്നവർ തുടങ്ങിയവർ ഇതുമൂലം വോട്ടർപട്ടികയിൽ ഉൾപ്പെടാതെ പോകുമെന്നും ആക്ഷേപമുണ്ട്‌. താമസംമാറി പോയവർക്കൊപ്പം മുമ്പ്‌ തിരിച്ചറിയാനാകാത്തവർ, മരിച്ചവർ, നിലവിൽ വോട്ടർപട്ടികയിൽ ഉൾപ്പെട്ടവർ, വിസമ്മതിച്ചവർ തുടങ്ങിയ വിഭാഗങ്ങളിലായിരുന്നു രേഖപ്പെടുത്തിയിരുന്നത്‌. എന്നാൽ ഇതിനി വേണ്ടെന്നും എല്ലാവരെയും സ്ഥലംമാറിയവരായി പരിഗണിച്ച്‌ എസ്‌ഐആർ ഡിജിറ്റൈസേഷൻ പ്രവർത്തനങ്ങൾ നൂറുശതമാനം തികച്ചെന്ന്‌ വരുത്താനാണ്‌ തെരഞ്ഞെടുപ്പ്‌ കമീഷന്റെ പുതിയ നിർദേശം. ഇവർക്ക്‌ പിന്നീട്‌ വെരിഫിക്കേഷൻ അവസരമുണ്ടാകുമെന്നാണ്‌ അറിയിപ്പ്‌. എന്നാൽ ഇതെങ്ങനെയെന്നതിൽ വ്യക്തതയില്ലെന്ന്‌ ബിഎൽഒമാർ പറയുന്നു. 80 ശതമാനം പൂർത്തിയാക്കാത്തവർക്കാണ്‌ ഇ‍ൗ നിർദേശം. 80 ശതമാനം പൂർത്തിയാക്കാത്തവരുടെ പേര്‌ വിവരങ്ങൾ പരസ്യമാക്കി സമർദത്തിലാക്കുന്നുവെന്നും ആരോപണമുണ്ട്‌.