വിജയം ആവർത്തിക്കാൻ 
വെൺമണി

മാവേലിക്കര

വെൺമണി പഞ്ചായത്തിലെ മുഴുവൻ വാർഡുകളും തെക്കേക്കര തഴക്കര പഞ്ചായത്തുകളിലെ 14, ആലയിലെ ഏഴ്‌, മുളക്കുഴയിലെ മൂന്ന്‌, ഉൾപ്പെടെ 53 വാർഡുകളാണ്‌ ജില്ലാ പഞ്ചായത്ത് വെൺമണി ഡിവിഷനിൽ. ചെട്ടികുളങ്ങര പഞ്ചായത്തിലെ വാർഡുകൾ ഇത്തവണ ഒഴിവാക്കിയിട്ടുണ്ട്. ഇളകാത്ത ഉറച്ച ഇടത് കോട്ടയാണ് വെണ്മണി. തെക്കേക്കര പഞ്ചായത്ത് മുൻ വൈസ്‌പ്രസിഡന്റും സിപിഐ എം മാവേലിക്കര ഏരിയ കമ്മിറ്റിയംഗവുമായ ടി വിശ്വനാഥനെയാണ് വിജയത്തുടർച്ചയ്‌ക്കായി എൽഡിഎഫ്‌ നിയോഗിച്ചിരിക്കുന്നത്. ബ്ലോക്ക് പഞ്ചായത്ത് കുറത്തികാട് ഡിവിഷൻ മുൻ അംഗം, തെക്കേക്കര കിഴക്ക് ലോക്കൽ സെക്രട്ടറി, ഡിവൈഎഫ്ഐ തെക്കേക്കര വില്ലേജ് സെക്രട്ടറി, പ്രസിഡന്റ്‌, കെഎസ്‌കെടിയു ഏരിയ സെക്രട്ടറി എന്നീ നിലകളിൽ പ്രവർത്തിച്ചു. നിലവിൽ പട്ടികജാതി ക്ഷേമസമിതി ഏരിയ സെക്രട്ടറി, റബ്ബർ എസ്‌റ്റേറ്റ് വർക്കേഴ്സ് യൂണിയൻ (സിഐടിയു) താലൂക്ക് പ്രസിഡന്റ്‌, അഭയം പെയിൻ ആൻഡ് പാലിയേറ്റീവ് കെയർ സൊസൈറ്റി തെക്കേക്കര കിഴക്ക് ചെയർമാൻ എന്നീ നിലകളിൽ പ്രവർത്തിക്കുന്നു. സർക്കാരിന്റെയും തദ്ദേശസ്ഥാപനങ്ങളുടെയും വികസനങ്ങൾ എണ്ണിപ്പറഞ്ഞ് എൽഡിഎഫ്‌ പ്രചാരണത്തിൽ ഏറെ മുന്നിലാണ്. ജില്ലാ പഞ്ചായത്തിന്റെ 9.29 കോടിയുടെ പദ്ധതികളും 2.21 കോടിയുടെ സംയുക്ത പദ്ധതികളുമടക്കം 11.50 കോടിയുടെ വികസനമാണ് നടപ്പാക്കിയത്. തഴക്കര അറുനൂറ്റിമംഗലം സീഡ് ഫാമിൽ 1.87 കോടിയുടെ ഫാം ടൂറിസം പദ്ധതി, അയനിയാട്ട് ഓട നിർമാണം, ചക്കാലമുക്ക് ട്രാൻസ്‌ഫോർമർ ജങ്ഷൻവരെ കാന നിർമാണം, പാവൂർ റോഡ് റീടാറിങ്, തഴക്കര വാർഡ് ഏഴിൽ അങ്കണവാടി, സഞ്‌ജയ് കടവ് നിർമാണം, സീഡ് ഫാം ക്വാർട്ടേഴ്സ് നിർമാണം, സെയിൽസ് കൗണ്ടർ, ആട്– പശു ഫാം, ഓഡിറ്റോറിയം, ലൈബ്രറി, കുന്നം ഗവ. ഹയർ സെക്കൻഡറി സ്‌കൂളിൽ കിച്ചണും ടോയ്‌ലറ്റും, ഓഡിറ്റോറിയം, പുളിഞ്ചിക്കാട്ട് കുടിവെള്ളപദ്ധതി, പാറച്ചന്ത ഐഎച്ച്ഡിപി നഗർ സമഗ്രവികസനം, ചാങ്ങമല റോഡ് പുനരുദ്ധാരണം, കക്കട റോഡ് നിർമാണം, പൂവനേത്ത് കമ്യൂണിറ്റി ഹാൾ, കരിയിലത്തറ റോഡ് നിർമാണം, കൊയ്‌പ്പള്ളി കാരാൺമ വളഞ്ഞ നടക്കാവ് റോഡ് പുനരുദ്ധാരണം, പൗരസമിതി ഗ്രന്ഥശാല നിർമാണം, പെണ്ണുക്കര ക്ഷേത്രം റോഡ് പുനരുദ്ധാരണം തുടങ്ങി വികസനപരന്പര. യുഡിഎഫ് സ്ഥാനാർഥിയായി കെ ലെജുകുമാറും എൻഡിഎ സ്ഥാനാർഥിയായി എം കെ സുരേഷ്‌ബാബുവും മത്സരരംഗത്തുണ്ട്