കൈയകലത്തിൽ കെആർഎൽ

കോട്ടയം റബർ കർഷകർക്ക്‌ കരുതലായി വെള്ളൂരിൽ കേരള റബർ ലിമിറ്റഡ്‌ വ്യവസായ പാർക്ക്‌ റെഡിയാകുന്നു. ചെറുകിട, -ഇടത്തരം സംരംഭകർക്കായി എല്ലാ സൗകര്യങ്ങളോടും കൂടിയാണ്‌ 157.04 ഏക്കറിൽ പദ്ധതി. ആദ്യഘട്ടം പ്രവർത്തനം ഫെബ്രുവരിയിൽ ആരംഭിക്കും. 18 സംരംഭങ്ങൾക്ക്‌ സ്ഥലത്തിനായി താൽപ്പര്യപത്രം നൽകിയിട്ടുണ്ടെന്ന്‌ കെആർഎൽ ചെയർപേഴ്‌സണും എംഡിയുമായ ഷീല തോമസ്‌ പറഞ്ഞു. 12 റബർ അധിഷ്ടിത സംരംഭത്തിനും അഞ്ച്‌ ടയർ അനുബന്ധ റബർ സംരംഭത്തിനും ഒരെണ്ണം ടയർ ഉൾപ്പെടെയുള്ളവയുടെ നിർമാണത്തിന്‌ ഉപേയോഗിക്കുന്ന ലാറ്റക്‌സ്‌ സംരംഭമാണ്‌. ഭരണവിഭാഗം ഓഫീസ്‌ തുറക്കുന്നതോടെ നിലവിൽ കെപിപിഎൽ ആസ്ഥാനത്ത്‌ പ്രവർത്തിക്കുന്ന കെആർഎൽ ഓഫീസ്‌ സ്വന്തം സ്ഥലത്തേക്ക്‌ മാറുമെന്നും അവർ പറഞ്ഞു.

​​റബർ കർഷകരെ കൈവിടാതെ 
സർക്കാർ ​വിലയിടിവിൽ പ്രയാസപ്പെടുന്ന റബർ കർഷകർക്ക്‌ താങ്ങുവില വർധിപ്പിക്കുന്നതിനൊപ്പം സ്വാഭാവിക റബറിലുള്ള ഉൽപ്പന്നങ്ങൾ വർധിപ്പിച്ച്‌ കൂടുതൽ വരുമാനവും തൊഴിലും ലക്ഷ്യമിട്ടാണ്‌ സംസ്ഥാന സർക്കാരിന്റെ ഇച്ഛാശക്തിയിൽ കെആർഎൽ സ്ഥാപിതമായത്‌. 2023ൽ പദ്ധതി പ്രവർത്തനമാരംഭിച്ചു. സംസ്ഥാന സർക്കാർ ബജറ്റുകളിലായി 33 കോടി രൂപ അനുവദിച്ചു. കേന്ദ്ര സർക്കാരിന്റെ ചെറുകിട വ്യവസായ വികസന ബാങ്കിൽനിന്ന്‌ സംസ്ഥാന സർക്കാരിന്റെ വായ്‌പ പരിധിയിൽ 202 കോടി രൂപ ലഭ്യമാക്കി. മൂന്ന്‌ വർഷത്തേയ്‌ക്ക്‌ പലിശമാത്രം അടച്ചാൽ മതി. വ്യവസായ വകുപ്പിന്റെ കീഴിലുള്ള കേരള പേപ്പർ പ്രൊഡക്ട്‌സ്‌ ലിമിറ്റഡിന്റെ ഭൂമിയിൽനിന്നാണ്‌ 157.04 ഏക്കർ സർക്കാർ കെആർഎലിന്‌ വിട്ടുകൊടുത്തത്‌. 
 അടിസ്ഥാന സ‍ൗകര്യത്തിന്‌ 400 കോടി ​അടിസ്ഥാന സ‍ൗകര്യ വികസനമൊരുക്കൽ അന്തിമഘട്ടത്തിലാണ്‌. 400 കോടി രൂപയാണ്‌ ആദ്യഘട്ടത്തിൽ ആകെ ചെലവ്‌ കണക്കാക്കുന്നത്‌. ഭരണവിഭാഗം കെട്ടിടനിർമാണം പൂർത്തിയായി. 110 കെവി സബ്‌സ്‌റ്റേഷൻ നിർമാണം അവസാനഘട്ടത്തിലാണ്‌. ചതുപ്പ്‌ നിലമായിരുന്ന പ്രദേശത്ത്‌ പുതിയ റോഡായി. റബറിന്റെ റിസർച്ച്‌ ആൻഡ്‌ ഡെവലപ്‌മെന്റ്‌ സെന്റർ, പരിശീലനം കേന്ദ്രം എന്നിവ ആദ്യഘട്ടത്തിൽ വരും. 189 കോടി രൂപ ചെലവിട്ടാണ്‌ ഇത്‌. കൂടെ വാട്ടർ ട്രീറ്റ്‌മെന്റ്‌ പ്ലാന്റും മലിനജല ശുദ്ധീകരണ പ്ലാന്റും സ്ഥാപിക്കും. 35 കോടി രൂപ ചെലവിലാണിത്‌. തുടർന്ന്‌ റബർ റീസൈക്ലിങ്‌ സെന്റർ, റബർ സംഭരണ കേന്ദ്രം, ടൂൾ കേന്ദ്രം, സ്‌റ്റെറിലൈസേഷൻ സെന്റർ, റബർ ടെസ്‌റ്റിങ്‌ സെന്റർ, നാഷണൽ റബർ പ്രോഡക്ട്‌സ്‌ എക്‌സിബിഷൻ സെന്റർ എന്നിവയും സ്ഥാപിക്കും. ​വരുമാനവും 
തൊഴിലും വിലക്കുറവ്‌ മൂലം പ്രതിസന്ധി നേരിടുമ്പോഴും റബർ കർഷകർക്കും സംരംഭകർക്കും കെആർഎല്ലിൽ വലിയ പ്രതീക്ഷയാണ്‌. സ്വാഭാവിക റബറിനെ ഏറ്റവും ഫലപ്രദവും കാര്യക്ഷമവുമായി ഉപയോഗപ്പെടുത്താൻ ഇവിടെ സാധിക്കും. നേരിട്ടും അല്ലാതെയും വലിയ തൊഴിൽസാധ്യതകളാണ്‌ കെആർഎൽ തുറക്കുക. ഓട്ടോമൊബൈൽ പാർട്‌സ്‌, കൈയുറകൾ, റബർമാറ്റുകൾ തുടങ്ങിയ ഉൽപ്പന്നങ്ങളിലൂടെ റബറിന്റെ വിപണി വിപുലമാക്കാനും ലക്ഷ്യമുണ്ട്‌. സ്വാഭാവിക റബർ വ്യവസായം അടിസ്ഥാനമാക്കിയുള്ള വ്യവസായങ്ങൾ സ്ഥാപിച്ച്‌ റബറുപയോഗം വർധിപ്പിക്കുകയും അതുവഴി റബറിന്റെ വിലകൂട്ടുകയുമാണ്‌ കെആർഎൽ ലക്ഷ്യമിടുന്നത്‌. അയ്യായിരം പേർക്ക്‌ നേരിട്ടും പതിനായിരം പേർക്ക്‌ പരോക്ഷമായും തൊഴിൽനൽകുന്ന ബൃഹത്തായ സംരംഭമാണ്‌ വെള്ളൂരിൽ ഒരുങ്ങുന്നത്‌.