നാളെമുതൽ ദിവസവും 10 വീടിന്റെ വാർപ്പ്‌

കൽപ്പറ്റ -മുണ്ടക്കൈ: ഉരുൾ അതിജീവിതർക്കായി സർക്കാർ കൽപ്പറ്റ നഗരത്തിൽ ഒരുക്കുന്ന ട‍ൗൺഷിപ്പിൽ വീടുകളുടെ നിർമാണം യുദ്ധകാല വേഗതയിൽ. ചൊവ്വാഴ്‌ചമുതൽ ദിവസവും പത്തുവീടിന്റെ പ്രധാന വാർപ്പ്‌ പൂർത്തിയാക്കാനാണ്‌ നിർമാണ ചുമതലയുള്ള ഉ‍ൗരാളുങ്കൽ ലേബർ കോൺട്രാക്ട്‌ സൊസൈറ്റിയുടെ തീരുമാനം. ട‍ൗൺഷിപ്പിനുള്ളിൽ പുനരധിവാസം ആവശ്യപ്പെട്ട മുഴുവൻ കുടുംബങ്ങൾക്കുമുള്ള വീടിന്റെ പ്രധാന വർപ്പ്‌ 25–നുള്ളിൽ പൂർത്തിയാക്കും. ഞായറാഴ്‌ചവരെ 60 വീടുകൾ വാർത്തു. ആയിരത്തി ഇരുനൂറിലധികം തൊഴിലാളികളുമായി വീട്‌, റോഡ്‌, സ്വീവേജ് ട്രീറ്റ്‌മെന്റ്‌ പ്ലാന്റ്‌, കുടിവെള്ള സംഭരണി, ഡ്രെയ്‌നേജ്‌ തുടങ്ങിയവയുടെ പ്രവൃത്തി പുരോഗമിക്കുകയാണ്‌. രാപകൽ ഷിഫ്‌റ്റ്‌ അടിസ്ഥാനത്തിലാണ്‌ പ്രവൃത്തി നടക്കുന്നത്‌.


ആദ്യ സോണിൽ 43, മൂന്നാം സോണിൽ ആറ്‌, അഞ്ചാം സോണിൽ 11 എന്നിങ്ങനെയാണ്‌ വാർപ്പ്‌ പൂർത്തിയായ വീടുകൾ. 88 വീടിന്‌ പില്ലർ ഉയർന്നു. വാർപ്പ്‌ കഴിഞ്ഞ ഏഴ്‌ വീടിന്റെ കട്ടകെട്ടൽ പ്രവൃത്തിയും പൂർത്തിയായി. ഇ‍ൗ വീടുകളിൽ തേപ്പ്‌, പ്ലംബിങ്, വയറിങ്, ടൈൽ പാകൽ തുടങ്ങിയ പ്രവൃത്തി നടത്തുന്നു. ഒപ്പം ആദ്യഘട്ട പെയ്‌ന്റിങ്ങും ആരംഭിച്ചു. കൽപ്പറ്റ ബൈപാസിൽനിന്ന്‌ ട‍ൗൺഷിപ്പിലേക്കുള്ള മൂന്നു പ്രധാന കവാടങ്ങളും തുറന്ന്‌ അഞ്ചു സോണുകളെയും ബന്ധിപ്പിക്കുന്ന റോഡുവെട്ടൽ പൂർത്തിയാക്കി.

12 മീറ്റർ വീതിയുള്ള പ്രധാന റോഡിലും ഒമ്പത്‌ മീറ്റർ വീതിയുള്ള രണ്ട്‌ ഉപറോഡുകളിലും കല്ലുവിരിച്ച്‌ അത്യാധുനിക നിലവാരത്തിൽ ടാറിങ് നടത്താനുള്ള മുന്നൊരുക്കവും പൂർത്തിയാകുന്നു. ക്ലസ്റ്ററുകളായി തിരിച്ച വീടുകളിലേക്കും പൊതുകെട്ടിടങ്ങളിലേക്കും ഉൾപ്പെടെ 11.72 കിലോമീറ്ററാണ്‌ ആകെ റോഡ്‌ നിർമിക്കുന്നത്‌. വീട്‌ നിർമാണം പൂർത്തിയായ ഉടൻ ആരോഗ്യകേന്ദ്രവും മാർക്കറ്റും ഉൾപ്പെടെയുള്ള പൊതുകെട്ടിടങ്ങളുടെ നിർമാണത്തിലേക്ക്‌ കടക്കും.