കൊള്ളാമല്ലോ, കൊളാഷ്‌ സാരി

കാഞ്ഞങ്ങാട്‌

ഒരിക്കലും മങ്ങാത്ത തിളക്കമാണ്‌ കാസർകോട്‌ സാരിയുടെ പ്രത്യേകത, അലക്കും തോറും തിളക്കം കൂടുന്ന വിവിധ ഡിസൈനിലുള്ള സാരികൾ ഉപയോഗിച്ച്‌ ബോധവൽക്കരണ കൊളാഷ്‌ ഒരുക്കിയാലോ. ആരം കൊള്ളാലോ കൊളാഷ്‌ എന്നേ പറയൂ. കാഞ്ഞങ്ങാട് നെഹ്റു കോളേജിൽ നടന്ന കണ്ണൂർ സർവകലാശാലാ എൻഎസ്എസ് നേതൃ ക്യാന്പിലാണ്‌ കാസർകോടൻ സാരികളുപയോഗിച്ച്‌‌ കൊളാഷൊരുക്കിയത്‌. എയ്ഡ്‌സ് ദിന സന്ദേശം സമൂഹത്തിൽ എത്തിക്കുക എന്ന ലക്ഷ്യത്തോടെയാണ് സാരികളും ഷാളുകളും ഉപയോഗിച്ച് മനോഹരമായ കൊളാഷ് ചിത്രീകരണം സംഘടിപ്പിച്ചത്. ചിത്രകാരൻ പ്രഭൻ നീലേശ്വരത്തിന്റെ നേതൃത്വത്തിലായിരുന്നു നിർമാണം. തുണിത്തരങ്ങൾ ഉപയോഗിച്ചുള്ള സൃഷ്ടി, ക്യാമ്പിലെ വളണ്ടിയർമാർക്ക് പുത്തൻ അനുഭവമായി. കാസർകോട്, കണ്ണൂർ, വയനാട് ജില്ലയിലെ തെരഞ്ഞെടുക്കപ്പെട്ട വളണ്ടിയർമാർ ക്യാമ്പിൽ പങ്കെടുത്തു. സർവകലാശാല സ്‌റ്റുഡന്റ്‌സ്‌ ഡീൻ ഡോ. കെ വി സുജിത്ത്, എൻഎസ്എസ് കോഡിനേറ്റർമാരായ ഡോ. കെ വി വിനീഷ് കുമാർ, ഡോ. കെ പി നിധീഷ്, കെ ഷിജി, പ്രോഗ്രാം ഓഫീസർമാരായ കെ ഷനോജ്, പി ഷീബ, കെ രാധ എന്നിവർ സംസാരിച്ചു.