വരാപ്പുഴയുടെ സ്നേഹവായ്‌പുകൾ ഏറ്റുവാങ്ങി അഡ്വ. ഡീന ജോസഫ്‌

വരാപ്പുഴ

ജനങ്ങളുടെ സ്നേഹാദരവുകൾ ഏറ്റുവാങ്ങി ജില്ലാപഞ്ചായത്ത് ആലങ്ങാട് ഡിവിഷൻ എൽഡിഎഫ് സ്ഥാനാർഥി അഡ്വ. ഡീന ജോസഫിന്റെ സ്വീകരണപര്യടനം വരാപ്പുഴയിൽ തുടങ്ങി.

വരാപ്പുഴ പഞ്ചായത്തിന്റെ വികസനമുരടിപ്പും കഴിഞ്ഞ അഞ്ചുവർഷം ജില്ലാപഞ്ചായത്ത് എൽഡിഎഫ് പ്രതിനിധി വരാപ്പുഴയിൽ നടപ്പാക്കിയ പദ്ധതികളും നാട്ടുകാരുമായി പങ്കിട്ടാണ്‌ പര്യടനം മുന്നേറുന്നത്‌. പ്രതിപക്ഷ നേതാവ് വി ഡി സതീശന്റെ മണ്ഡലത്തിൽ ഉൾപ്പെട്ട പഞ്ചായത്താണെങ്കിലും വികസനപദ്ധതികളോ തൊഴിൽ സംരംഭങ്ങളോ തുടങ്ങാനാകാത്തതും വോട്ടർമാർ അവതരിപ്പിച്ചു.

ചെട്ടിഭാഗത്ത് സിപിഐ എം ജില്ലാ കമ്മിറ്റി അംഗം എ ആർ രഞ്ജിത്ത് ഉദ്ഘാടനം ചെയ്ത പര്യടനം 22 കേന്ദ്രങ്ങളിലെ സ്വീകരണം ഏറ്റുവാങ്ങി മരോട്ടിച്ചുവടിൽ സമാപിച്ചു. സമാപനസമ്മേളനം സിപിഐ സംസ്ഥാന എക്സിക്യൂട്ടീവംഗം കെ എം ദിനകരൻ ഉദ്ഘാടനം ചെയ്തു. ​

ബ്ലോക്ക് ഡിവിഷൻ സ്ഥാനാർഥികളായ ഷീല ടെല്ലസ്, മിഥുൻ ജോസഫ്, പ്രിയ ഭരതൻ എന്നിവരും പഞ്ചായത്തിലെ എൽഡിഎഫ് സ്ഥാനാർഥികളും പര്യടനത്തിൽ പങ്കെടുത്തു. തിങ്കൾ രാവിലെ ഏഴിന് ആലങ്ങാട് പഞ്ചായത്തിലെ ഒളനാടിൽനിന്നു തുടങ്ങുന്ന പര്യടനം രാത്രി ഏഴിന് മാളികംപീടികയിൽ സമാപിക്കും.