ക്വാണ്ടം സിദ്ധാന്തം സൂക്ഷ്മ തലത്തിൽ അറിയാൻ

പാലാ ശാസ്ത്രകുതുകികളായ വിദ്യാർഥികൾക്കും പൊതുജനങ്ങൾക്കും സൂക്ഷ്‌മതലത്തിൽ ക്വാണ്ടം സിദ്ധാന്തം വിശദീകരിച്ച് പാലാ സെന്റ്‌ തോമസ് കോളേജിലെ ക്വാണ്ടം സെഞ്ച്വറി എക്‌സിബിഷൻ. ടൺകണക്കിന് ഭാരമുണ്ടായിരുന്ന ആദ്യകാല കംപ്യൂട്ടറിൽനിന്ന് ചെറിയ നാനോചിപ്പുകളിലേക്കുള്ള ശാസ്ത്രത്തിന്റെ ജൈത്രയാത്ര വിശദീകരിക്കുന്ന ക്വാണ്ടം തിയറി മോഡൽ ഓരോ സ്‌റ്റാളും കണികാ സിദ്ധാന്തത്തിലേക്ക് സന്ദർശകരെ കൂട്ടിക്കൊണ്ടു പോകുന്നത്. പക്ഷികൾ ദേശാടനത്തിനുശേഷം കൃത്യമായി തിരിച്ചെത്തുന്നതിന് പിന്നിൽ ക്വാണ്ടം ബയോളജിയാണെന്ന് പ്രദർശനം വിശദീകരിക്കുന്നു. ആവർത്തനപ്പട്ടിക, ആറ്റംഘടന, ഓർബിറ്റൽ തിയറി, സബ് ആറ്റോമിക് പാർട്ടിക്കിളുകൾ, സെമികണ്ടക്ടറുകൾ തുടങ്ങിയവയും ഫ്ലൂറസൻസ്, സൂപ്പർ ഫ്ലൂയിഡിറ്റി, സൂപ്പർ കണ്ടക്ടിവിറ്റി തുടങ്ങിയ ക്വാണ്ടം പ്രതിഭാസങ്ങളും സാങ്കേതികവിദ്യകളും ശാസ്ത്രജ്ഞരുടെ സംഭാവനകളുമെല്ലാം എക്സിബിറ്റുകളും മോഡലുകളുമായി പ്രദർശനത്തിലുണ്ട്. ടി കെ രാധ, ബിബ ചൗധരി തുടങ്ങിയ ഇന്ത്യൻ വനിതാ ശാസ്ത്രജ്ഞരെ പരിചയപ്പെടുത്തുന്ന ആർട്ടിസ്റ്റ് ശ്രീജ പള്ളത്തിന്റെ ശിൽപ്പങ്ങൾ, ക്വാണ്ടം സയൻസിലെ ഇന്ത്യൻ സംഭാവനകൾ പരിചയപ്പെടുത്തുന്ന ആർ യദുനാഥിന്റെ പെയിന്റിങ് പരമ്പര, ജെസ്റ്റിൻ ജോസഫ് ഒരുക്കിയ ഐൻസ്റ്റൈനും മേരിക്യൂറിയും തുടങ്ങിയ കലാസൃഷ്ടികളും പ്രദർശനത്തിന്റെ ഭാഗമാണ്. സെന്റ്‌ തോമസ് കോളേജ് ഫിസിക്സ് വകുപ്പിനെ റിസർച്ച് വിഭാഗമായി ഉയർത്തിയതിന്റെ 25ാം വാർഷികത്തോടനുബന്ധിച്ച് കേരള ശാസ്ത്ര സാഹിത്യ പരിഷത്ത്, പരിഷത്തിന്റെ വെബ് പോർട്ടലായ ലൂക്ക, കൊച്ചി ശാസ്ത്ര സാങ്കേതിക സർവകലാശാല, സെന്റർ ഫോർ സയൻസ് ഇൻ സൊസൈറ്റി എന്നിവരുടെ സഹകരണത്തോടെയാണ് പ്രദർശനം. അഞ്ച് വരെ തുടരുന്ന പ്രദർശനത്തോടനുബന്ധിച്ച് എല്ലാ ദിവസവും പ്രഭാഷണങ്ങൾ, പാനൽ ചർച്ചകൾ, സയൻസ് ബാൻഡ് തുടങ്ങിയ അനുബന്ധപരിപാടികളും ഉണ്ടാകും. ജെസ്റ്റിൻ ജോസഫ് ഒരുക്കിയ ഐൻസ്റ്റൈനും മേരിക്യൂറിയും തുടങ്ങിയ കലാ സൃഷ്ടികളും പ്രദർശനത്തിന്റെ ഭാഗമാണ്‌. രാവിലെ ഒൻപത് മുതൽ വൈകിട്ട് ആറ് വരെയാണ് പ്രദർശനം. സ്കൂളുകൾക്ക് എക്സിബി ഷൻ കാണാൻ www.q.luca.co.inൽ മുൻകൂട്ടി രജിസ്റ്റർ ചെയ്യാം.