വീണ്ടും ചുവക്കാൻ വൈക്കം

തലയോലപ്പറമ്പ് ​രൂപീകരണം മുതൽ എൽഡിഎഫിൽ അടിയുറച്ച ജില്ലാ പഞ്ചായത്ത്‌ ഡിവിഷനായ വൈക്കത്ത്‌ നാല്‌ പഞ്ചായത്തുകളിലായി 50 വാർഡുകളുണ്ട്‌. ചെമ്പ് പഞ്ചായത്തിലെ 17, മറവൻതുരുത്തിലെ 12, ഉദയനാപുരത്തെ 16, തലയാഴത്തെ അഞ്ച്‌ വാർഡുകൾ ചേരുന്നു. സിപിഐ വടകര ലോക്കൽ കമ്മിറ്റിയംഗം എം കെ രാജേഷാണ്‌ എൽഡിഎഫ് സ്ഥാനാർഥി. വിദ്യാർഥി യുവജന രംഗങ്ങളിലൂടെ പൊതുപ്രവർത്തനത്തിലെത്തിയ എം കെ രാജേഷ് വടകര സഹകരണ ബാങ്ക് ഡയറക്ടർ ബോർഡംഗവും എഐവൈഎഫ് വൈക്കം മണ്ഡലം കമ്മിറ്റിയംഗവുമായിരുന്നു. കഴിഞ്ഞതവണ എൽഡിഎഫിന്റെ പി എസ് പുഷ്പമണിയാണ്‌ വിജയിച്ചത്‌. ഡിവിഷനിൽ 10.5 കോടിയുടെ മാതൃകാപരമായ വികസനമാണ്‌ നടത്തിയത്‌. വൈക്കം താലൂക്ക്‌ ആശുപത്രിയിൽ 1. 42 കോടി രൂപ ചെലവഴിൽ സ്ഥാപിച്ച മാമോഗ്രാം യൂണിറ്റ്‌ അഭിമാനനേട്ടങ്ങളിൽ ഒന്നാണ്. വിദ്യാഭ്യാസ മേഖലയിൽ ഒന്നരക്കോടിയുടെ വികസനം. ചെമ്പ്, ഉദയനാപുരം ആശുപത്രികൾക്ക് ആംബുലൻസ്, ബ്രഹ്മമംഗലം ഖാദി സെന്റർ(25 ലക്ഷം), തലയാഴം പുന്നപ്പുഴയിൽ വയോജനകേന്ദ്രം(35 ലക്ഷം), ഉദയനാപുരം ബ്ലോക്ക് ജങ്‌ഷനിൽ സ്ഥാപിച്ച ടേക്ക് എ ബ്രേക്ക് എന്നിവയാണ്‌ മറ്റ്‌ പ്രധാനപദ്ധതികൾ. തലയാഴം പഞ്ചായത്ത് മുൻ പ്രസിഡന്റ് കെ ബിനിമോനാണ് യുഡിഎഫ് സ്ഥാനാർഥി. സൗമ്യ മജീന്ദ്രൻ എൻഡിഎ സ്ഥാനാർഥി.