ഇനിയും ഉയരാൻ ഉഴവൂർ

ഉഴവൂർ നാല് പഞ്ചായത്തുകളിലായി 55 വാർഡുകൾ അടങ്ങുന്നതാണ്‌ ജില്ലാ പഞ്ചായത്ത് ഉഴവൂർ ഡിവിഷൻ. ഉഴവൂർ പഞ്ചായത്തിലെ 13, മരങ്ങാട്ടുപിള്ളിയിലെ ഒമ്പത്‌, രാമപുരം, വെളിയന്നൂർ പഞ്ചായത്തുകളിലെ മുഴുവൻ വാർഡുകളും ഉൾപ്പെടുന്നു. ആകെ 74,532 വോട്ടർമാർ. ഷിബി മത്തായിയാണ് എൽഡിഎഫ് സ്ഥാനാർഥി. വെളിയന്നൂർ പഞ്ചായത്ത് മുൻ പ്രസിഡന്റാണ്‌. 15 വർഷം പഞ്ചായത്തംഗമായി. അധ്യാപികയും ധനകാര്യ മാനേജ്മെന്റ്‌ വിദഗ്‌ധയുമാണ്‌. കേരള വനിത കോൺഗ്രസ് എം വെളിയന്നൂർ മണ്ഡലം പ്രസിഡന്റായും പ്രവർത്തിച്ചു. എൽഡിഎഫ്‌ പ്രതിനിധി പി എം മാത്യുവിന്റെ നേതൃത്വത്തിൽ സമാനതകളില്ലാത്ത പ്രവർത്തനങ്ങളാണ്‌ കഴിഞ്ഞ അഞ്ചുവർഷം നടന്നത്‌. എൽഡിഎഫ് പിടിച്ചെടുത്ത ഡിവിഷനിൽ 10കോടിയിലധികം രൂപയുടെ വികസന പ്രവർത്തനങ്ങൾ നടപ്പാക്കി. ഉഴവൂർ കെ ആർ നാരായണൻ സ്മാരക ഗവ. ആശുപത്രിയിലെ ഡയാലിസിസ് യൂണിറ്റ് ആരോഗ്യരംഗത്തെ പ്രധാനനേട്ടമാണ്. കുടിവെള്ള ക്ഷാമം പരിഹരിച്ച രാമപുരം പഞ്ചായത്തിലെ രണ്ട് ബൃഹത് പദ്ധതികൾ ഉൾപ്പെടെ ഡിവിഷനിലെ എട്ട് ജലവിതരണ പദ്ധതികൾ നടപ്പാക്കി. റോഡ് വികസനം, സ്കൂളുകളുടെയും അങ്കണവാടികളുടെയും നവീകരണം, കുട്ടികളുടെ പാർക്ക്, ഓപ്പൺ ജിം തുടങ്ങിയവ പ്രധാന പദ്ധതികൾ. ഉഴവൂർ ബ്ലോക്ക് പഞ്ചായത്തിലും സംസ്ഥാനത്തെ മികച്ച പഞ്ചായത്തിനുള്ള സ്വരാജ് ട്രോഫി നേടിയ വെളിയന്നൂർ പഞ്ചായത്തിലും മരങ്ങാട്ടുപിള്ളിയിലും എൽഡിഎഫാണ് ഭരണത്തിൽ. ഉഴവൂരിൽ ഒഐഒപി-–യുഡിഎഫ് സഖ്യവും രാമപുരത്ത് യുഡിഎഫുമാണ് ഭരണത്തിൽ. മുൻ ജില്ലാ പഞ്ചായത്തംഗവും അങ്കണവാടി അധ്യാപികയുമായ അനിതാ രാജുവാണ് യുഡിഎഫ് സ്ഥാനാർഥി. ഡോ. അപർണ എസ് മധുവാണ് എൻഡിഎ സ്ഥാനാർഥി.