ഉൽപ്പാദന, സേവന മേഖലകൾക്ക് പരിഗണന

മങ്കൊമ്പ്

വെളിയനാട് പഞ്ചായത്ത്‌ ബജറ്റിൽ ഉൽപ്പാദന, സേവന, പശ്ചാത്തല മേഖലകൾക്ക് മുൻതൂക്കം. ബജറ്റ് വൈസ്‌പ്രസിഡന്റ്‌ സുലജ റെനി അവതരിപ്പിച്ചു. പ്രസിഡന്റ്‌ വി എം ഷൈൻ അധ്യക്ഷനായി. കാർഷിക മേഖലയ്‌ക്ക്‌ 10 -ലക്ഷം രൂ‍പയും വിഷരഹിത പച്ചക്കറി പ്രോത്സാഹിപ്പിക്കാൻ 2.50 ലക്ഷവും പാടശേഖരങ്ങളുടെ പുറംബണ്ട് ബലപ്പെടുത്താൻ 10 ലക്ഷവും വകയിരുത്തിയിട്ടുണ്ട്. പാലിന് സബ്‌സിഡി നൽകാൻ 70,000 രൂപയും ഉൾപ്പെടുത്തി. മാസവരുമാനം 3000- രൂപ ലഭ്യമാക്കുക എന്ന ലക്ഷ്യം മുൻനിർത്തി അടുക്കളമുറ്റത്തെ കോഴിവളർത്തലിന്‌ 9.62 ലക്ഷവും പാൽ ഉൽപ്പാദനം വർധിപ്പിക്കാനും ക്ഷീരകർഷകർക്ക് മാസം 10,000- രൂപ അധിക വരുമാനം എന്ന ലക്ഷ്യത്തോടെ കറവപ്പശു വിതരണ പദ്ധതിക്ക്‌ 18.20 ലക്ഷവും വകയിരുത്തിയിട്ടുണ്ട്. ക്ഷീരകർക്ക് കാലിത്തീറ്റ സബ്‌സിഡിക്ക് രണ്ടുലക്ഷം രൂപയും തീറ്റപ്പുൽ, വൈക്കോൽ ലഭ്യമാക്കാൻ 80,000 -രൂപയും അനുവദിക്കും. ധാതുലവണ മിശ്രിതം പദ്ധതിക്കായി 15,000- രൂപയും തെരുവുനായ്‌ക്കളുടെ വാക്‌സിനേഷനായി 75,000 രൂപയും ഉൾപ്പെടുത്തി. 2.48 കോടി- രൂപ വരവും 2.32 കോടി ചെലവും കണക്കാക്കുന്ന ബജറ്റാണ്‌ അവതരിപ്പിച്ചത്.