മുട്ടാറിൽ 
സന്തോഷത്തിന്റെ 
നിറഞ്ഞൊഴുക്ക്​

മങ്കൊമ്പ് ‘

ഉള്ളൊഴുക്കിന്’ ദേശീയ അവാർഡ് ലഭിച്ചതിന്റെ സന്തോഷത്തിലാണ്​ മുട്ടാർ ഗ്രാമവും മണലിൽ കുടുംബവും. സിനിമയുടെ സംവിധായകൻ ക്രിസ്​റ്റോ ടോമിയുടെ അമ്മയുടെ വീടായ മണലിൽ വീട്ടിലും പരിസരത്തുമായിരുന്നു ഭൂരിഭാഗം ചിത്രീകരണവും. ഇപ്പോൾ ഇവിടെ താമസിക്കുന്നത് ക്രിസ്​റ്റോയുടെ അമ്മൂമ്മ അന്നമ്മ ആന്റണിയും മകൻ അലക്സ് ആന്റണിയുമാണ്. ഒരുപാട് തടസങ്ങൾ നേരിട്ടാണ് സിനിമ പൂർത്തീകരിക്കാനായതെന്ന് ക്രിസ്​റ്റോ ടോമിയുടെ അമ്മാവൻ ഷാജു ആന്റണി പറഞ്ഞു. അഭിനേതാക്കളും സാങ്കേതിക വിദഗ്​ധരും ഉൾപ്പെടെ എല്ലാവരും കഠിനാധ്വാനം ചെയ്​ത്​ നേടിയതാണ്​ അവാർഡ്​. വെള്ളപ്പൊക്കത്തിന്റെ പശ്ചാത്തലത്തിലുള്ള സിനിമ ആയതിനാൽ മണലിൽ വീട് ഉൾപ്പെടെയുള്ള രണ്ടേക്കർ പുരയിടത്തിന് ചുറ്റും ബണ്ട്​ നിർമിച്ച്​ വെള്ളം നിറച്ചായിരുന്നു ചിത്രീകരണം. മൂന്ന് മാസത്തേക്കാണ് ചിത്രീകരണം തീരുമാനിച്ചതെങ്കിലും കോവിഡ് വ്യാപനത്തെ തുടർന്ന് നീണ്ടു. രണ്ടുവർഷം എടുത്താണ്​ പൂർത്തീകരിക്കാനായത്. അതുവരെ വീട്ടുകാർക്ക് മാറി താമസിക്കേണ്ടിവന്നു.