പൊലീസാകണമെന്ന മോഹം; 
കാക്കിയിട്ട്​ ട്രെയിനിൽ പരിശോധന

ആലപ്പുഴ

ട്രെയിനിൽ എസ്ഐ ചമഞ്ഞ് പരിശോധന നടത്തിയ യുവാവ് പിടിയിൽ. തിരുവനന്തപുരം കള്ളിയോട് രോഹിണി ഭവനിൽ അഖിലേഷ് (30) ആണ് പിടിയിലായത്. തിരുവനന്തപുരത്തുനിന്ന്​ പുറപ്പെട്ട ചെന്നൈ എഗ്മോർ ഗുരുവായൂർ എക്സ്പ്രസിൽ ശനി പുലർച്ചെയായിരുന്നു സംഭവം. ട്രെയിൻ കായംകുളം കഴിഞ്ഞതോടെയാണ്​ എസ്​ വൺ കോച്ചിൽ കേരള പൊലീസിലെ സബ്​ ഇൻസ്​പെക്​ടറുടെ വേഷത്തിൽ അഖിലേഷിനെ റെയിൽവേ പൊലീസുകാർ കണ്ടത്​. പരിശോധനക്ക്​ എത്തിയ റെയിൽവേ പൊലീസ്​ ഉദ്യോഗസ്ഥനാണെന്ന ധാരണയിൽ പൊലീസുകാർ അടുത്തെത്തി. അഖിലേഷിന്റെ ഇടപെടലിൽ സംശയം തോന്നി ചോദ്യംചെയ്​തപ്പോഴാണ്​ ​ കള്ളിവെളിച്ചത്തായത്​. കുട്ടിക്കാലം മുതൽ പൊലീസിൽ ചേരണമെന്ന അഖിലേഷിന്​ ആഗ്രഹമുണ്ടായിരുന്നു. സിപിഒ പരീക്ഷ എഴുതിയെങ്കിലും ലിസ്റ്റിൽ ഇടം കിട്ടിയില്ല. ആഗ്രഹം കലശലായപ്പോൾ ജൂലൈയിൽ സ്വന്തമായി യൂണിഫോം തയ്​പ്പിച്ചു.​ തൃശൂരിൽ പിഎസ്​സി പരീക്ഷയ്​ക്കായി പോകുമ്പോൾ ക‍ൗതുകത്തിന്​ ഇത്​ ധരിക്കുകയായിരുന്നു. ആലപ്പുഴ റെയിൽവേ പൊലീസിന്​ കൈമാറിയ അഖിലേഷിനെ അറസ്റ്റുചെയ്​ത്​ ജാമ്യത്തിൽവിട്ടു.