അധ്യാപകരുടെ മാർച്ചും ധർണയും

സ്വന്തം ലേഖകൻ

ആലപ്പുഴ

കേരള സ്കൂൾ ടീച്ചേഴ്സ് അസോസിയേഷൻ ജില്ലാ കമ്മിറ്റി ജില്ലാ വിദ്യാഭ്യാസ ഉപഡയറക്ടറുടെ ഓഫീസിനു മുന്നിൽ ധർണ സംഘടിപ്പിച്ചു. മുൻ എംപി എ എം ആരിഫ് ഉദ്ഘാടനംചെയ്തു. ജില്ലാ പ്രസിഡന്റ്​ സി ജ്യോതികുമാർ അധ്യക്ഷനായി. കേന്ദ്രസർക്കാരിന്റെ ജനവിരുദ്ധനയങ്ങൾ തിരുത്തുക, കേരളത്തോട്​ അവഗണന അവസാനിപ്പിക്കുക, ദേശീയ വിദ്യാഭ്യാസ നയം 2020 തള്ളിക്കളയുക, പിഎഫ്ആർഡിഎ നിയമം പിൻവലിക്കുക, പങ്കാളിത്ത പെൻഷൻ പദ്ധതി ഉപേക്ഷിക്കുക, ശമ്പളപരിഷ്കരണ നടപടികൾ ആരംഭിക്കുക, ക്ഷാമബത്ത കുടിശ്ശിക അനുവദിക്കുക, അധ്യാപകരുടെ ജോലി സംരക്ഷണം ഉറപ്പാക്കുക തുടങ്ങിയ 36 ആവശ്യങ്ങൾ ഉന്നയിച്ചാണ്​ ധർണ. ഡിഇഒ ഓഫീസ് പരിസരത്തുനിന്ന്​ ആരംഭിച്ച മാർച്ചിൽ നൂറുകണക്കിന് അധ്യാപകർ പങ്കെടുത്തു. സംസ്ഥാന വൈസ് പ്രസിഡന്റ് എം എസ് പ്രശാന്ത്, എക്സിക്യൂട്ടീവ് അംഗം വി അനിത, സംസ്ഥാന കമ്മിറ്റി അംഗം എസ് സത്യജ്യോതി, ജില്ലാ സെക്രട്ടറി പി ഡി ജോഷി എന്നിവർ സംസാരിച്ചു. ജില്ലാ മാർച്ചിന്റെ ഭാഗമായി ക്യൂബൻ ഐക്യദാർഢ്യം സംഘടിപ്പിച്ചു. മനുഷ്യത്വരഹിതമായ ഉപരോധത്തിലൂടെ ക്യൂബയെ തകർക്കാൻ അമേരിക്കയിലെ ക്രൂരനടപടിക്കെതിരായി ക്യൂബൻ സഹായ ഫണ്ട് സമാഹരിച്ചു.