തൃക്കാക്കര നഗരസഭയിൽ അഞ്ച് അലമാരകൾ കുത്തിത്തുറന്നു ​

കാക്കനാട്

തൃക്കാക്കര നഗരസഭയിലെ പൊതുമരാമത്ത് വിഭാഗത്തിൽ പ്രധാന ഫയലുകൾ സൂക്ഷിച്ചിരുന്ന അഞ്ച് അലമാരകൾ കുത്തിത്തുറന്ന നിലയിൽ കണ്ടെത്തി. അസിസ്റ്റന്റ് എക്സിക്യൂട്ടീവ് എൻജിനീയറുടെയും അസിസ്റ്റന്റ് എൻജിനീയറുടെയും ക്യാബിനുകളിലെ അലമാരകളാണ് തുറന്നത്. ഫയലുകൾ മാറ്റിമറിച്ച് പരിശോധിച്ച നിലയിലായിരുന്നെങ്കിലും പ്രധാനപ്പെട്ട രേഖകൾ നഷ്ടപ്പെട്ടിട്ടില്ലെന്നാണ് പ്രാഥമിക നിഗമനം.

​പൊതുമരാമത്ത് എൻജിനീയറിങ് വിഭാഗത്തിൽ നവീകരണം നടക്കുന്നതിനാൽ ഫയലുകൾ സൂക്ഷിച്ചിരുന്ന അലമാരകൾ സമീപത്തെ മുറിയിലേക്ക് മാറ്റിയിരുന്നു. ഉദ്യോഗസ്ഥർ താൽക്കാലികമായി നഗരസഭയിലെ മറ്റു വിഭാഗങ്ങളിലിരുന്നാണ് ജോലി ചെയ്തിരുന്നത്.

​ശനിയാഴ്ച ഓഫീസ് അടച്ചുപോയശേഷം തിങ്കളാഴ്ച ഫയൽ എടുക്കാനെത്തിയപ്പോഴാണ് അലമാരകൾ കുത്തിത്തുറന്ന നിലയിൽ കണ്ടെത്തിയത്. നീല നിറങ്ങളിലുള്ള അലമാരകൾമാത്രമാണ് തുറന്നിരിക്കുന്നത്. പൊലീസിൽ പരാതി നൽകുമെന്ന് അധികൃതർ അറിയിച്ചു. നഗരസഭയിലെ സിസിടിവി കാമറകൾ മാസങ്ങളായി പ്രവർത്തനരഹിതമാണെന്നാണ് വിവരം.