പഠിച്ചിറങ്ങുമ്പോൾത്തന്നെ ജോലി ;
 മുഴുവൻ കലാലയങ്ങളിലും സ്കിൽ സെന്റർ

കൊച്ചി

ജില്ലയിലെ മുഴുവൻ കലാലയങ്ങളിലും സ്​കിൽ സെന്റർ രൂപീകരിക്കാൻ വിജ്ഞാന എറണാകുളം. കോളേജുകളിൽനിന്ന്​ പഠിച്ചിറങ്ങുമ്പോൾത്തന്നെ വിദ്യാർഥികൾക്ക്​ ജോലി ഉറപ്പാക്കുകയെന്ന ലക്ഷ്യത്തോടെയാണ് സ്കിൽ സെന്ററുകൾ ആരംഭിക്കാനൊരുങ്ങുന്നത്​. നിലവിൽ ജില്ലയിലെ തൊഴിലന്വേഷകർക്ക്​ തൊഴിൽ നൽകാനുള്ള മേളകൾ സംഘടിപ്പിക്കാനുള്ള നടപടികളുമായി മുന്നോട്ടുപോകുകയാണ്. ഇതിനുപുറമെയാണ്​​ സംസ്ഥാന സർക്കാർ നടപ്പാക്കുന്ന വിജ്ഞാനകേരളം ക്യാമ്പയിന്റെ ഭാഗമായി ​കോളേജുകളിലെ അവസാനവർഷ വിദ്യാർഥികളെ ലക്ഷ്യമിട്ട്​ സ്കിൽ സെന്ററുകൾ രൂപീകരിക്കുന്നത്​​.

കോളേജുകളിൽ സജ്ജമാക്കുന്ന സ്​കിൽ സെന്റർ വഴി വിവിധ തൊഴിൽമേഖലകളുമായി ബന്ധപ്പെട്ട കോഴ്​സുകളെ അടിസ്ഥാനമാക്കി​ വിദ്യാർഥികൾക്ക്​ നൈപുണി പരിശീലനം നൽകും. തുടർന്ന്​ വിജ്ഞാന എറണാകുളവുമായി സഹകരിച്ച്​ പ്രവർത്തിക്കുന്ന വിവിധ സ്ഥാപനങ്ങൾ, കമ്പനികൾ ഉൾപ്പെടെയുള്ള തൊഴിൽദാതാക്കളുമായി ബന്ധപ്പെട്ട്​ ​പ്ലേസ്​മെന്റ്​ നൽകും​. ജില്ലയിലെ മുഴുവൻ ഗവ, എയ്​ഡഡ്​, സ്വയംഭരണ​, പ്രൊഫഷണൽ ഉൾപ്പെടെ മുഴുവൻ ഉന്നതവിദ്യാഭ്യാസ സ്ഥാപനങ്ങളെയും പദ്ധതിയുടെ ഭാഗമാക്കും. 11ന്​ മഹാരാജാസ്​ കോളേജിൽ നടത്തുന്ന ശിൽപ്പശാലയിൽ കർമപദ്ധതിക്ക്​ രൂപംനൽകും. കോളേജുകളിലെ പ്രിൻസിപ്പൽ, പ്ലേസ്​മെന്റ്​ ഓഫീസർ, എൻഎസ്​എസ്​ കോ–ഓർഡിനേറ്റർമാർ, ഐക്യുഎസി കോ–ഓർഡിനേറ്റർമാർ എന്നിവരെ പങ്കെടുപ്പിച്ചാണ്​ ശിൽപ്പശാല. നിലവിൽ മികച്ചനിലയിൽ നൈപുണി പരിശീലനവും പ്ലേസ്​മെന്റും നടത്തുന്ന നാല്​ കലാലയങ്ങൾ അനുഭവം പങ്കുവയ്​ക്കും. തുടർന്ന്​ പൊതുചർച്ച. ഇതിലുൾപ്പെടെ ഉരുത്തിരിയുന്ന ആശയങ്ങൾ അടിസ്ഥാനമാക്കി അടുത്തവർഷത്തേക്കുള്ള കർമപദ്ധതി രൂപീകരിക്കും.

കുടുംബശ്രീയുമായി ചേർന്ന്​ ഓണത്തിന്​ ഒരുലക്ഷം തൊഴിൽ ലക്ഷ്യമിട്ടുള്ള സംസ്ഥാന ക്യാമ്പയിൻ വിജയിപ്പിക്കാനുള്ള പ്രവർത്തനങ്ങളും പുരോഗമിക്കുകയാണ്​. ജില്ലയിൽ ചുരുങ്ങിയത്​ 15,000 തൊഴിൽ ഇ‍ൗ മാസം നടക്കുന്ന പ്രാദേശികമേളകളിൽ ലഭ്യമാക്കാനുള്ള പ്രവർത്തനങ്ങളാണ്​ നടത്തുന്നത്​. കുടുംബശ്രീ വഴിയാണ്​ തൊഴിൽ അന്വേഷകരെ കണ്ടെത്തുന്നത്​. തൊഴിൽദാതാക്കൾ സഹകരിക്കാൻ മുന്നോട്ടുവന്നിട്ടുണ്ട്​. പ്രാദേശിക തൊഴിൽമേളകൾക്കുശേഷം സെപ്​തംബറിൽ മെഗാ തൊഴിൽമേള സംഘടിപ്പിക്കും.