അരികെയുണ്ട്‌ കേരള കെയർ; 
കിടപ്പുരോഗികൾക്ക്‌ കൈത്താങ്ങ്‌

കൊച്ചി

കിടപ്പുരോഗികൾക്ക്‌ മികച്ച വൈദ്യപരിചരണവും സേവനങ്ങളും ഉറപ്പാക്കി കേരള കെയർ (പാലിയേറ്റീവ്‌ കെയർഗ്രിഡ്‌). സംസ്ഥാന സർക്കാർ ആവിഷ്‌കരിച്ച കേരള കെയറിൽ ഇതിനകം ജില്ലയിൽ രജിസ്റ്റർ ചെയ്‌തത്‌ 14,451 രോഗികളാണ്‌. തിങ്കൾ വൈകിട്ട്‌ വരെയുള്ള കണക്കാണിത്‌. ഇതിനകം 26,416 ഭവന സന്ദർശനം നടത്തി ആവശ്യമായ പരിചരണം നൽകി ആശ്വാസം പകരാൻ കേരള കെയർ വഴിയായി.

ജില്ലയിൽ 120 സർക്കാർ സംവിധാനങ്ങളും 137 സർക്കാരിതര സംഘടനകളും കേരള കെയറിന്റെ ഭാഗമാണ്‌. ഇതുവഴിയാണ്‌ രോഗികൾക്ക്‌ വൈദ്യസഹായം ഉൾപ്പെടെ ലഭ്യമാക്കുന്നത്‌. രജിസ്റ്റർ ചെയ്‌ത രോഗികളിൽ 8567 പേർ സ്‌ത്രീകളാണ്‌. 5868 പേർ പുരുഷന്മാരും. ട്രാൻസ്‌ ഉൾപ്പെടെയുള്ള മറ്റ്‌ വിഭാഗങ്ങളിൽനിന്നായി 16 പേരുമുണ്ട്‌. 71–-80 പ്രായപരിധിയിലുള്ളവരാണ്‌ കൂടുതലും–- 4338 പേർ. 81–-90 വയസ്സിനിടയിൽ 3765 പേർ, 61–-70ന്‌ ഇടയിൽ 2678, 51–-60ന്‌ ഇടയിൽ 1294, 90ന്‌ മുകളിൽ 1274, 41–-50ന്‌ ഇടയിൽ 576, 31–-40ന്‌ ഇടയിൽ 238, 19–-30ന്‌ ഇടയിൽ 210, 18 വയസ്സുവരെയുള്ളവരിൽ 78 പേരുമാണ്‌ രജിസ്റ്റർ ചെയ്‌തത്‌.

ഇതിൽ സ്വന്തമായി ചലിക്കാൻ കഴിയാത്തവരുടെ എണ്ണം 3564. കിടക്കയിൽ സ്വയം തിരിയാൻ കഴിയുന്നവർ 1951, പരസഹായത്തോടെ ഇരിക്കാൻ കഴിയുന്നവർ 1632, പരസഹായമില്ലാതെ ഇരിക്കാനാകുന്നവർ 1155, മറ്റുള്ളവരുടെ സഹായത്തോടെ എഴുന്നേൽക്കാനാകുന്നവർ 967 എന്നിങ്ങനെയാണുള്ളത്‌. ഡോക്ടർമാർ, നഴ്‌സുമാർ, സന്നദ്ധപ്രവർത്തകർ എന്നിവർ വീടുകളിൽ എത്തിയുള്ള വൈദ്യസഹായം, ശുശ്രൂഷ, മരുന്നുകൾ, പരിചരണസാമഗ്രികൾ, ഉപകരണങ്ങൾ, സ്ഥാപനതലത്തിലുള്ള വൈദ്യസഹായം, പരിചരണം ഉൾപ്പെടെ കേരള കെയറിലൂടെ ലഭ്യമാക്കുന്നു. ആരോഗ്യ, തദ്ദേശ വകുപ്പുകളുടെ നേതൃത്വത്തിലാണ്‌ പദ്ധതി.

സാന്ത്വനപരിചരണം അഥവാ പാലിയേറ്റീവ്‌ കെയർ

ഗുരുതര രോഗങ്ങൾമൂലം പ്രയാസം അനുഭവിക്കുന്നവർക്കും കുടുംബങ്ങൾക്കും ശാരീരികവും മാനസികവും സാമൂഹികവുമായ പിന്തുണ നൽകി അവരുടെ ജീവിതനിലവാരം മെച്ചപ്പെടുത്തുക എന്നതാണ് സാന്ത്വനപരിചരണംകൊണ്ട്‌ ലക്ഷ്യമിടുന്നത്‌.

സേവനം ആർക്കെല്ലാം

ദീർഘകാലരോഗങ്ങൾമൂലം കിടക്കയിൽനിന്ന് എഴുന്നേൽക്കാൻ പരസഹായം ആവശ്യമുള്ള എല്ലാവർക്കും ഗുരുതര രോഗപീഡകൾ അനുഭവിക്കുന്നവർക്കും പാലിയേറ്റീവ് കെയർ സേവനങ്ങൾ പ്രയോജനപ്പെടുത്താം.

സേവനം ലഭിക്കാൻ

സാന്ത്വനപരിചരണം ലഭ്യമാക്കുന്ന സേവനദാതാക്കളെ പാലിയേറ്റീവ്‌ ഗ്രിഡ്‌ വഴി കണ്ടെത്താം. https://kerala.care/palliative-care സന്ദർശിച്ചാൽ സമീപമുള്ള സർക്കാർ, സന്നദ്ധസംഘടന സേവനദാതാക്കളെ ഇതുവഴി കണ്ടെത്തി സേവനം ആവശ്യപ്പെടാനാകും. സേവനം നൽകാൻ തയ്യാറുള്ള സംഘടനകൾക്കും സ്ഥാപനങ്ങൾക്കും രജിസ്റ്റർ ചെയ്യാം.

സംസ്ഥാന ഉദ്‌ഘാടനം 28ന്‌

‘പാലിയേറ്റീവ് കെയർ ഗ്രിഡിന്റെ' സംസ്ഥാന ഉദ്ഘാടനം 28ന് നടക്കും. വൈകിട്ട് നാലിന് കളമശേരി രാജഗിരി സ്കൂൾ ഓഡിറ്റോറിയത്തിൽ മുഖ്യമന്ത്രി പിണറായി വിജയൻ ഉദ്ഘാടനം നിർവഹിക്കും.