ജെമിനി സർക്കസ് ഇന്നുമുതൽ തൃപ്പൂണിത്തുറയിൽ

തൃപ്പൂണിത്തുറ

അമ്പരിപ്പിക്കുന്ന സാഹസികപ്രകടനങ്ങളും കണ്ണഞ്ചിപ്പിക്കുന്ന അഭ്യാസമുറകളും കൗതുകക്കാഴ്‌ചകളുമായി ജെമിനി സർക്കസ് ശനിയാഴ്‌ചമുതൽ തൃപ്പൂണിത്തുറയിൽ പ്രദർശനം തുടങ്ങും.

കുട്ടികൾക്കും മുതിർന്നവർക്കും ആസ്വാദനത്തിന്റെ പുതിയ കാഴ്ച സമ്മാനിക്കുന്ന ജെമിനി സർക്കസ് പുതിയകാവ് ഭഗവതിക്ഷേത്ര മൈതാനത്ത്‌ രാത്രി ഏഴിന് തൃപ്പൂണിത്തുറ നഗരസഭാ അധ്യക്ഷൻ പി എൽ ബാബു ഉദ്ഘാടനം ചെയ്യും. ദിവസവും രണ്ടുമണിക്കൂർവീതം ദൈർഘ്യമുള്ള മൂന്ന് പ്രദർശനങ്ങളാണ് ഉണ്ടാകുക. പകൽ ഒന്നിനും വൈകിട്ട് നാലിനും രാത്രി ഏഴിനുമാണ് പ്രദർശനങ്ങൾ.

ആഫ്രിക്കൻ ഫയർ ഡാൻസ്, കത്തികൾക്കുമുകളിൽ കിടന്നുകൊണ്ടുള്ള നൈഫ് ബാലൻസിങ്‌, മരണക്കിണർ, ഫയർഡാൻസ്, സ്കൈ വാക്ക്, സ്പ്രിങ്‌ നെറ്റ്, ഗ്ലോബൽ റൈഡിങ്‌ തുടങ്ങി ഒട്ടേറെ വിസ്‌മയക്കാഴ്ചകളാണ് ഇത്തവണ ഒരുക്കിയിരിക്കുന്നത്. സാഹസികതയുടെ ലോകം തീർക്കുന്ന സർക്കസ് ആവേശ കാഴ്ചകൾക്ക് എത്യോപ്യ, മണിപ്പുർ, നാഗാലാൻഡ് എന്നിവിടങ്ങളിൽനിന്നുള്ള 60ലേറെ കലാകാരന്മാരാണ് പങ്കെടുക്കുന്നത്.