പതിറ്റാണ്ടുകൾക്കുശേഷം 
നാടോടി സർക്കസ് സംഘം ഏലൂരിൽ

കളമശേരി

തുലാവർഷം വിടപറയുമ്പോൾ കൊയ്ത്ത് കഴിഞ്ഞ പാടത്തേക്ക് കൊട്ടും കുരവയുമായെത്തിയിരുന്ന സൈക്കിൾ സർക്കസ് സംഘം പതിറ്റാണ്ടുകൾക്കുശേഷം ഏലൂരിൽ വീണ്ടുമെത്തി. പതിവായി ദേശാടനക്കിളികൾ വന്നിറങ്ങുന്ന വടക്കുംഭാഗം പാടശേഖരത്തിന് സമീപമാണ് ശ്രീ ചാമുണ്ഡേശ്വരി സൈക്കിൾ സർക്കസ് സംഘം എത്തിയത്.

ഇരുപതുവർഷമായി ദക്ഷിണേന്ത്യ മുഴുവൻ സീസൺ അനുസരിച്ച്‌ പരിപാടി നടത്തി ജീവിക്കുന്ന മൈസൂരു കെ ആർ നഗറിൽനിന്നുള്ള നാടോടിസംഘമാണ്‌ വടക്കുംഭാഗം സുബ്രഹ്മണ്യ ക്ഷേത്രത്തിനുസമീപം തമ്പടിച്ചത്. സുന്ദർ, ലക്ഷ്മണൻ എന്നിവരും ഭാര്യയും മക്കളുമടങ്ങുന്ന കുടുംബവും സഹായികളും ഉൾപ്പെടുന്നതാണ് സംഘം. ടെന്റ്‌, സൈക്കിൾ, മറ്റ് സാമഗ്രികൾ എന്നിവയുമായി മൂന്ന് വാഹനത്തിലാണ് ഇവർ ഏലൂരിലെത്തിയത്.

വർണവെളിച്ചം വിതറിയ മൈതാനത്ത് സൈക്കിൾ അഭ്യാസങ്ങളും തമിഴ് നായികാനായകന്മാരുടെ വേഷത്തിൽ റിക്കാർഡ് ഡാൻസും സാഹസിക വിനോദങ്ങളുമായി പത്തംഗസംഘം വ്യാഴം വൈകിട്ടോടെയാണ് രണ്ടുദിവസപരിപാടി ആരംഭിച്ചത്. രാത്രി ഏഴുമുതൽ 10 വരെ പരിപാടി അവതരിപ്പിക്കും. കാണികൾ നൽകുന്ന സംഭാവനയാണ് സംഘത്തിന്റെ വരുമാനം. മൂന്നുപതിറ്റാണ്ടിനുശേഷമെത്തുന്ന നാടോടി സർക്കസ് കാണാൻ പഴമക്കാരും പുതിയ തലമുറയും ആവേശത്തോടെ ദൂരസ്ഥലങ്ങളിൽനിന്നുപോലും ക്ഷേത്രപരിസരത്തേക്ക് എത്തിയിരുന്നു.