മൂന്ന് ബോട്ടുകളും 20 ടൺ മത്സ്യവും പിടിച്ചെടുത്തു

മട്ടാഞ്ചേരി

ചെറുമത്സ്യവേട്ട തടയാൻ ഫിഷറീസ് വകുപ്പ്‌ എറണാകുളത്തെ ഹാർബറുകളിൽ നടത്തിയ പരിശോധനയിൽ മൂന്ന് ബോട്ടുകൾ പിടിച്ചെടുത്തു. ബോട്ടുകളിൽനിന്നായി 20 ടണ്ണോളം ചെറുമത്സ്യം പിടിച്ചെടുത്തു. രണ്ടാഴ്ചയ്‌ക്കകം ആറ് ബോട്ടുകളാണ് ഇത്തരത്തിൽ പിടിച്ചത്.

അസി. ഡയറക്ടർ കെ പി ഗ്രേസിയും സംഘവും നടത്തിയ പട്രോളിങ്ങിലാണ് അറ്റ്‌ലസ് എന്ന ബോട്ട് ചെറുമത്സ്യങ്ങളുമായി പിടിയിലായത്. ഫിഷറീസ് എക്സ്റ്റൻഷൻ ഓഫീസർ സിന്ധുവിന്റെ നേതൃത്വത്തിലുള്ള സംഘം നടത്തിയ പരിശോധനയിൽ ചെറുമത്സ്യങ്ങളുമായി എത്തിയ രണ്ട് ബോട്ടുകളും പിടിച്ചെടുത്തിരുന്നു. തുടർന്ന് ഫിഷറീസ് മറൈൻ എൻഫോഴ്സ്മെന്റ് ബോട്ടുകൾ കസ്റ്റഡിയിലെടുത്തു.

ഫിഷറീസ് ഡെപ്യൂട്ടി ഡയറക്ടർ പി പി സിന്ധു മൂന്ന് ബോട്ടുകൾക്കും 2.5 ലക്ഷം രൂപവീതം പിഴ ചുമത്തി. പിടിച്ചെടുത്തവയിൽ ഭക്ഷ്യയോഗ്യമായ മത്സ്യം ലേലംചെയ്ത വകയിൽ ലഭിച്ച 1.2 ലക്ഷം രൂപ സർക്കാരിലേക്ക് അടച്ചു.