കള്ളാർ കണ്ട്‌ കൊതിക്കേണ്ട

കള്ളാർ

കുടിയേറ്റ ജനതയും ആദിവാസി സമൂഹവും ഇടകലർന്ന ദേശമാണ്‌ കള്ളാർ. ഇവിടുത്തെ മനുഷ്യരുടെ ചരിത്രത്തിലും വർത്തമാനത്തിലും ഇ‍ൗ രണ്ട്‌ സംസ്‌കാരങ്ങളുടെ പ്രതിഫലനങ്ങൾ കാണാം. മണ്ണിനോട്‌ പടവെട്ടിയും കാട്ടുമൃഗങ്ങളോട്‌ രോഗങ്ങളോടും പൊരുതിയും വളർന്നതാണ്‌ കള്ളാറിലെ ജനജീവിതം. ഓരോ തെരഞ്ഞെടുപ്പുകളിലും കള്ളാറിന്റെ ചുവപ്പുരാശി കൂടുതൽ ചുവന്നതാവുന്നുണ്ട്‌. ഗോത്രജനതയ്‌ക്കും കാർഷികമേഖലയ്‌ക്കുമായി എൽഡിഎഫ്‌ സർക്കാർ പ്രഖ്യാപിച്ച ജനക്ഷേമ നയങ്ങളുടെ ഗുണഫലം അനുഭവിച്ചറിയുന്നവരാണ്‌ കള്ളാറിലെ ജനം. ഏറ്റവുമൊടുവിൽ സംസ്ഥാന സർക്കാർ റബ്ബറിന്‌ 200 രൂപ താങ്ങുവില പ്രഖ്യാപിച്ചത്‌ ഇ‍ൗ മേഖലയിലുണ്ടാക്കിയ ആഹ്ലാദം ചെറുതല്ല. കിഫ്‌ബി, കാസർകോട്‌ വികസനപാക്കേജ്‌, എംഎൽഎയുടെ ആസ്‌തി വികസന ഫണ്ട്‌, ത്രതില പഞ്ചായത്ത്‌ സംവിധാനങ്ങളുടെ വാർഷിക പദ്ധതികൾ എന്നിവ ഉപയോഗപ്പെടുത്തിയുള്ള വന്പൻ വികസനനേട്ടങ്ങളാണ്‌ കള്ളാറിലുണ്ടായി. കോടോം ബേളൂർ പഞ്ചായത്തിലെ 21 വാർഡുകൾ, കള്ളാറിലെ 12 വാർഡുകൾ, ബളാൽ പഞ്ചായത്ത്‌ ഒന്നാം വാർഡ്‌, കിനാനുർ കരിന്തളത്തെ നാല്‌ വാർഡുകളും ഉൾപ്പെട്ടതാണ്‌ ഡിവിഷൻ. ആകെ 38 പഞ്ചായത്ത്‌ വാർഡുകൾ. പരപ്പ ബ്ലോക്ക്‌ പഞ്ചായത്തിലെ ബേളൂർ, തായന്നൂർ, ബാനം, കോടോം ഡിവഷിനും ഇ‍ൗ ജില്ലാ പഞ്ചായത്ത്‌ ഡിവിഷൻ പരിധിയിലുമാണ്‌. പ്രധാനമത്സരം എൽഡിഎഫും യുഡിഎഫും തമ്മിലാണ്‌. ബിജെപിയും മത്സരരംഗത്തുണ്ട്‌. ബളാൽ പഞ്ചായത്ത്‌ സ്‌ഥ്‌രിം സമിതി അധ്യക്ഷയായി തിളങ്ങിയ റീന തോമസ്‌ എൽഡിഎഫിനായി രണ്ടില ചിഹ്‌നത്തിൽ മത്സരിക്കുന്നു. കേരള കോൺഗ്രസ്‌ എം ജില്ലാ കമ്മറ്റിയംഗമാണ്‌ പൊതുരംഗത്ത്‌ വർഷങ്ങളായി നിറസാന്നിധ്യമാണ്‌. യുഡിഎഫിനായി കോൺഗ്രസിലെ സ്‌റ്റിമി സ്‌റ്റീഫൻ മത്സരിക്കുന്നു. ബിജെപിയിലെ ധന്യസുമോദും മത്സരരംഗത്തുണ്ട്‌. എൽഡിഎഫിലെ ഷിനോജ്‌ ചാക്കോ 2460 വോട്ടിന്റെ ഭൂരിപക്ഷത്തോടെ വിജയിച്ച ഡിവിഷനാണിത്‌.