ചെന്നൈ-ഗോവ ഇൻഡിഗോ വിമാനത്തിന് ബോംബ് ഭീഷണി; സർവീസ് അഞ്ച് മണിക്കൂറോളം വൈകി

ചെന്നൈ: ബോംബ് ഭീഷണിയെത്തുടർന്ന് ചെന്നൈയിൽ നിന്ന് ഗോവയിലേക്കുള്ള ഇൻഡിഗോ വിമാനത്തിന്റെ സർവീസ് അഞ്ച് മണിക്കൂറോളം വൈകി. ചെന്നൈ വിമാനത്താവളത്തിലാണ് സംഭവം.

ചെന്നൈയിൽ നിന്ന് ഗോവയിലേക്ക് പുറപ്പെടേണ്ടിയിരുന്ന ഇൻഡിഗോ 6E588 വിമാനത്തിനാണ് ബോംബ് ഭീഷണി ലഭിച്ചത്. വൈകിട്ട് 5.40ന് പുറപ്പെടേണ്ടിയിരുന്ന വിമാനത്തിന് ഭീഷണി ലഭിച്ചതിനെ തുടർന്ന് ബോംബ് ഭീഷണി വിലയിരുത്തൽ സമിതി യോഗം ചേർന്ന് വൈകിട്ട് 6.05ന് ഇത് ഗൗരവമുള്ളതാണെന്ന് വിലയിരുത്തി. തുടർന്ന് വിമാനം പ്രത്യേക ഐസൊലേഷൻ ബേയിലേക്ക് മാറ്റി.

തുടർന്ന് സുരക്ഷാ ജീവനക്കാരുടെ നേതൃത്വത്തിൽ കർശന പരിശോധനകൾ ആരംഭിക്കുകയും, വൈകിട്ട് 6.55-ഓടെ എല്ലാ യാത്രക്കാരെയും വിമാനത്തിൽ നിന്ന് താഴെയിറക്കുകയും ചെയ്തു. പരിശോധനകൾ പൂർത്തിയായതിനെ തുടർന്ന് രാത്രി 9.20-ഓടെയാണ് ബോംബ് ഭീഷണി ഒഴിവായതായി അധികൃതർ പ്രഖ്യാപിച്ചത്. തുടർന്ന് വിമാനം ഇൻഡിഗോ അധികൃതർക്ക് തിരികെ കൈമാറി.

നിശ്ചയിച്ച സമയത്തിൽ നിന്ന് ഏകദേശം അഞ്ച് മണിക്കൂർ വൈകി രാത്രി 10.30-ഓടെയാണ് വിമാനം ഗോവയിലേക്ക് പുറപ്പെട്ടത്. ഭീഷണിയുടെ ഉറവിടം എവിടെയാണെന്നത് സംബന്ധിച്ച് കൂടുതൽ വിവരങ്ങൾ ലഭ്യമല്ല.