ജനറൽ ആശുപത്രിയിൽ പാൽ മുടങ്ങി

കാസർകോട്

കാസർകോട് ജനറൽ ആശുപത്രിയിൽ കിടപ്പുരോഗികൾക്കുള്ള പാൽ വിതരണം മുടങ്ങി. ആശുപത്രിയിലേക്ക്​ പാൽ നൽകുന്ന മിൽമ മാവുങ്കാൽ ഡെയ്​റിക്ക്​ നഗരസഭ ഒരു വർഷമായി പണം നൽകാതായതോടെയാണ്​ വിതരണം നിർത്തിയത്​. നഗരസഭയുടെ അനാസ്ഥയെ തുടർന്ന്​ ആശുപത്രിയിലുള്ള കിടപ്പുരോഗികൾക്ക് പോഷകാഹാരമായി കിട്ടിയിരുന്ന പാൽ ഇല്ലാതായി. 2024 ആഗസ്​ത്​ മുതലുള്ള കുടിശ്ശികയായ 7,57,493 രൂപ മിൽമയ്​ക്ക്​ ലഭിക്കാനുണ്ട്​. ജനറൽ ആശുപത്രിയുടെ ദൈനംദിന കാര്യങ്ങൾക്കുള്ള തുക നൽകേണ്ടത് നഗരസഭയാണ്​​. എന്നാൽ മിൽമയ്ക്ക്​ കുടിശ്ശിക തുക നൽകുന്നതിൽ കടുത്ത അലംഭാവമാണ്​ കാട്ടിയത്​. ഇതിന്റെ ദുരിതം പേറുന്നതാകട്ടെ പാവപ്പെട്ട നിർധനരായ കിടപ്പുരോഗികളും. ഡിവൈഎഫ്​ഐ നേതൃത്വത്തിൽ ഉച്ചയ്​ക്ക്​ നൽകുന്ന പൊതിച്ചോർ മാത്രമാണ്​ നിലവിലുള്ള ഏക ആശ്വാസം. കുടിശ്ശിക ഗഡുക്കളായെങ്കിലും അടയ്​ക്കണമെന്നാവശ്യപ്പെട്ട് മിൽമ കത്തയച്ചിരുന്നതായും ആശുപത്രി അധികൃതരെ നേരിൽ കണ്ട് അറിയിച്ചതായും പറയുന്നു. കുടിശ്ശിക നൽകാൻ പലതവണ നഗരസഭാ ചെയർമാനെയും ബന്ധപ്പെട്ട ഉദ്യോഗസ്ഥരെയും വിവരമറിയിച്ചതായി ആശുപത്രി സൂപ്രണ്ട്​ ശ്രീകുമാർ മുകുന്ദൻ പറഞ്ഞു. നഗരസഭ പണം അനുവദിച്ചാലുടൻ മിൽമയ്​ക്ക്​ കൈമാറുമെന്നും സൂപ്രണ്ട്​ പറഞ്ഞു. പണമടച്ചാൽ വിതരണം പുനസ്ഥാപിക്കുമെന്നാണ് മിൽമയുടെ നിലപാട്.