പോരാട്ടത്തിനൊപ്പം നാട്‌ അഖിലേന്ത്യ പണിമുടക്ക്‌ ജില്ലയിൽ സമ്പൂർണം

കാസർകോട്‌

കേന്ദ്രസർക്കാരിന്റെ തൊഴിലാളി, കർഷക, ജനവിരുദ്ധനയങ്ങൾക്കെതിരെ സംയുക്ത ട്രേഡ്‌ യൂണിയൻ സമിതി ആഹ്വാനംചെയ്‌ത 24 മണിക്കൂർ പണിമുടക്ക്‌ ജില്ലയിൽ സമ്പൂർണം. എല്ലാ മേഖലയിലെയും തൊഴിലാളികൾ അണിനിരന്നതോടെ ജില്ല സ്‌തംഭിച്ചു. കട–-കമ്പോളങ്ങൾ അടഞ്ഞുകിടന്നു. മത്സ്യ മാർക്കറ്റുകളും പ്രവർത്തിച്ചില്ല. സ്വകാര്യബസ്സുകളും കെഎസ്‌ആർടിസി ബസ്സുകളും നിരത്തിലിറങ്ങിയില്ല. ഓട്ടോ–- ടാക്‌സി വാഹനങ്ങളും ഓടിയില്ല. തൊഴിലാളികളും കേന്ദ്ര, സംസ്ഥാന സർക്കാർ ജീവനക്കാരും അധ്യാപകരും പൊതുമേഖലാ ജീവനക്കാരും ബാങ്കിങ്‌,- ഇൻഷുറസ്‌ മേഖലകളിലെ ഭൂരിഭാഗവും ജീവനക്കാരും പണിമുടക്കി. ഇൻഷുറൻസ്‌ ജീവനക്കാരും അണിചേർന്നു. കർഷക, കർഷകത്തൊഴിലാളികളും പണിമുടക്കി. വാണിജ്യ, വ്യാപാര സ്ഥാപനങ്ങളിലെയും കയറ്റിറക്ക്, നിർമാണം, മത്സ്യം, ഷോപ്പ്, ടാങ്കർ ലോറി, ലൈറ്റ് മോട്ടോർ, ബസ് തുടങ്ങിയ വാഹനങ്ങളിലെ തൊഴിലാളികളും പണിമുടക്കി. പ്രധാന ടൗണുകളായ കാസർകോട്‌, കാഞ്ഞങ്ങാട്‌, നീലേശ്വരം, ചെറുവത്തൂർ, തൃക്കരിപ്പൂർ, കാലിക്കടവ്‌, വെള്ളരിക്കുണ്ട്‌, ചീമേനി, രാജപുരം, കുറ്റിക്കോൽ എന്നിവിടങ്ങളിലും പണിമുടക്ക്‌ പൂർണമായിരുന്നു. കാസർകോട്‌ നഗരത്തിൽ രാവിലെ ചില ഓട്ടോകൾ ഓടാൻ ശ്രമിച്ചതിനെത്തുടർന്ന്‌ അൽപനേരം വാക്കേറ്റമുണ്ടായതൊഴിച്ചാൽ ശാന്തമായിരുന്നു പണിമുടക്ക്‌. കാസർകോട്‌ പുതിയ ബസ്‌സ്‌റ്റാൻഡ്‌ പരിസരത്ത്‌ നിന്നാരംഭിച്ച പ്രകടനം നഗരംചുറ്റി പഴയ ബസ്‌സ്‌റ്റാൻഡ്‌ ഹെഡ്‌പോസ്‌റ്റോഫീസിന്‌ മുന്നിൽ സമാപിച്ചു. പൊതുയോഗം കർഷകസംഘം സംസ്ഥാന ജോയിന്റ്‌ സെക്രട്ടറി സി എച്ച്‌ കുഞ്ഞമ്പു എംഎൽഎ ഉദ്‌ഘാടനംചെയ്‌തു. എഐടിയുസി ജില്ലാ ജനറൽ സെക്രട്ടറി ടി കൃഷ്‌ണൻ അധ്യക്ഷനായി. സിഐടിയു സംസ്ഥാന സെക്രട്ടറി ടി കെ രാജൻ, എൻഎൽയു ജില്ലാസെക്രട്ടറി സി എം എ ജലീൽ, കെഎസ്‌ടിഎ സംസ്ഥാന സെക്രട്ടറി കെ രാഘവൻ, സിഐടിയു ജില്ലാപ്രസിഡന്റ്‌ പി മണിമോഹൻ, കാസർകോട്‌ പ്രസ്‌ ക്ലബ്‌ പ്രസിഡന്റ്‌ സിജു കണ്ണൻ, കെസിഇയു (സിഐടിയു) സംസ്ഥാന വൈസ്‌ പ്രസിഡന്റ്‌ പി ജാനകി, എഐടിയുസി ജില്ലാസെക്രട്ടറി ബിജു ഉണ്ണിത്താൻ എന്നിവർ സംസാരിച്ചു. സിഐടിയു ജില്ലാ ജനറൽ സെക്രട്ടറി സാബു അബ്രഹാം സ്വാഗതം പറഞ്ഞു. പണിമുടക്കിയ തൊഴിലാളികളും ജീവനക്കാരും കാഞ്ഞങ്ങാട്‌ നഗരത്തിൽ പ്രകടനവും പൊതുയോഗവും നടത്തി. സമര കേന്ദ്രത്തിൽതന്നെ ചായയും ഉച്ചഭക്ഷണവും തയ്യാറാക്കി വൈകിട്ടുവരെ സമര വളണ്ടിയർമാർ പണിമുടക്കിൽ അണിനിരന്നു. പൊതുയോഗം സിഐടിയു സംസ്ഥാന കമ്മറ്റിയംഗം വി വി പ്രസന്നകുമാരി ഉദ്‌ഘാടനം ചെയ്‌തു. കെ വി രാഘവൻ അധ്യക്ഷനായി. ജില്ലാസെക്രട്ടറി വി വി രമേശൻ, എഫ്‌എസ്‌ഇടിഒ ജില്ലാ സെക്രട്ടറി കെ ഹരിദാസ്‌, സിഐടിയു ജില്ലാ വൈസ്‌ പ്രസിഡന്റ്‌ കാറ്റാടി കുമാരൻ, കെ രാജ്‌മോഹൻ, അഡ്വ. പി അപ്പുക്കുട്ടൻ, സിഐടിയു സംസ്ഥാന കമ്മറ്റിയംഗം എ മാധവൻ, എം രാഘവൻ, എം സന്തോഷ്‌, കെ കുഞ്ഞിക്കണ്ണൻ, അഡ്വ. കെ രാമചന്ദ്രൻ, കെ വി വിശ്വനാഥൻ, കെ ഷിബു, എം ബാലകൃഷ്‌ണൻ, അനിൽകുമാർ, കെ സുരേന്ദ്രൻ, കെ ടി കുഞ്ഞുമോൻ എന്നിവർ സംസാരിച്ചു.