ഇ എം എസ്സായി പകർന്നാട്ടം അഭിനയത്തിലും മുദ്ര പതിപ്പിച്ച് എം പി പരമേശ്വരന്
കാഞ്ഞങ്ങാട് മാർക്സിസ്റ്റ് സൈദ്ധാന്തികനും ആണവശാസ്ത്രജ്ഞനുമായ എം പി പരമേശ്വരന് അഭിനയരംഗത്തും മികവ് പുലര്ത്തിയ ബഹുമുഖപ്രതിഭ. എഴുത്തുകാരന് പി വി കെ പനയാല് തിരക്കഥയും സംഭാഷണവും രചിച്ച ‘എ കെജി അതിജീവനത്തിന്റെ കനല്വഴികള്’ എന്ന ഡോക്യുമെന്ററി സിനിമയില് ഇ എം എസായി അഭിനയിച്ചത് എം പി പരമേശ്വരനായിരുന്നു. പട്ടം താണുപിള്ള മുഖ്യമന്ത്രിയായിരുന്ന കാലത്ത് നടന്ന അമരാവതി കുടിയൊഴിപ്പിക്കലുമായി ബന്ധപ്പെട്ട ഭാഗം തിരുവനന്തപുരത്തെ പഴയ അസംബ്ലി ഹാളിലാണ് ചിത്രീകരിച്ചത്. കുടിയൊഴിപ്പിക്കലിനെതിരെ അന്ന് പ്രതിപക്ഷ നേതാവായിരുന്ന ഇ എം എസ് നിയമസഭയില് അടിയന്തിരപ്രമേയം അവതരിപ്പിച്ച ചരിത്രത്തെ പുനരാവിഷ്കരിച്ചുള്ള രംഗത്തിലാണ് എം പി പരമേശ്വരന് അഭിനയിച്ചത്. ചായ്യോത്ത്, കയ്യൂര്, ആലപ്പുഴ തുടങ്ങി കേരളത്തിന്റെ വിവിധ ഭാഗങ്ങളില് എ കെ ജി സിനിമയുടെ ചിത്രീകരണം നടന്നു. പ്രശസ്ത സംവിധായകന് ഷാജി എന് കരുണ് സംവിധാനംചെയ്ത ഈ സിനിമ 2007ലാണ് കേരളത്തിലുടനീളം പ്രദര്ശനത്തിനെത്തിയത്. പകുതി ഡോക്യുമെന്ററിയും പകുതി ബയോപ്പിക്കുമായി ഒരുക്കിയ ചിത്രം കേരളത്തിലെ കമ്യൂണിസ്റ്റ് പ്രസ്ഥാനത്തിന്റെ ഉള്വഴികളിലൂടെ സഞ്ചരിക്കുന്നതായിരുന്നു. നടന് പി ശ്രീകുമാറാണ് എ കെ ജിയെ അവതരിപ്പിച്ചത്. ചിത്രത്തിലൂടെ ഇം എം എസ് നമ്പൂതിരിപ്പാടായി പരമേശ്വരന് ആസ്വാദകരുടെ ഹൃദയം കീഴടക്കി. ഇ കെ നായനാര്, ജ്യോതിബസു, സി എച്ച് മുഹമ്മദ് കോയ തുടങ്ങിയ ചരിത്ര പുരുഷന്മാരും ഈ ചിത്രത്തില് അവതരിപ്പിക്കപ്പെട്ടു.
0 comments