സഹായത്തിന് കുങ്കിയാനകളെത്തി

പാലക്കാട്​

മൂന്നാഴ്​ചയായി ജനവാസമേഖലയിൽ ഭീതിപടർത്തുന്ന പി ടി അഞ്ചിനെ (ചുരുളിക്കൊമ്പൻ കാട്ടാന) പിടികൂടി​ ചികിത്സിക്കാനുള്ള നടപടി അന്തിമഘട്ടത്തിൽ. ചികിത്സാ സഹായത്തിനായി വയനാട്ടിൽനിന്ന് വിക്രം, ഭരത്​ എന്നീ ​ കുങ്കിയാനകളെ​ എത്തിച്ചു​. തിങ്കൾ രാവിലെ എത്തിച്ച ആനകൾ മലമ്പുഴയിലെ വാളയാർ റേഞ്ച്​ ഓഫീസിനുസമീപം വിശ്രമത്തിലാണ്​. ദ്രുതപ്രതികരണസേനയും സ്ഥലത്തെത്തി. രണ്ടുദിവസത്തിനകം ചീഫ്​ വെറ്ററിനറി സർജൻ അരുൺ സഖറിയയും സംഘവും പാലക്കാട്​ എത്തും. തുടർന്ന്​ പി ടി അഞ്ചിനെ പിടികൂടാനുള്ള നടപടി ആസൂത്രണം ചെയ്യും. വലതുകണ്ണിന് കാഴ്ചക്കുറവുള്ള പി ടി 5നെ മയ്ക്കുവെടിവച്ച്‌ ചികിത്സിക്കാൻ വനംവകുപ്പ്‌ നേരത്തെ തീരുമാനിച്ചിരുന്നു. വെറ്ററിനറി ഡോക്ടർമാരും മയക്കുവെടി വിദഗ്​ധരും വനംവകുപ്പ്‌ ഉദ്യോഗസ്ഥരുംചേർന്ന് സമിതി രൂപീകരിച്ചിട്ടുണ്ട്​. ജൂലൈ 12നാണ്​ മലമ്പുഴ വനമേഖലയിൽ പി ടി 5ന്റെ സാന്നിധ്യം വനംവകുപ്പ്​ അധികൃതർ തിരിച്ചറിയുന്നത്​. ആനയെ പിന്നീട്​ പന്നിമട, ആറങ്ങോട്ടുകുളമ്പ്​, പയറ്റുകാട്​, വാധ്യാർചള്ള, ആരോഗ്യമട എന്നിവിടങ്ങളിലും കണ്ടെത്തി. തിങ്കൾ രാവിലെ മലമ്പുഴ റോഡിലുള്ള പന്നിമടയിലും കോങ്ങാട്ടുപാടത്തുമാണ് പി ടി 5 എത്തിയത്. രാവിലെ പന്നിമടയില്‍ കാട്ടാന റോഡ് കുറുകെ കടന്നിരുന്നു. വനം വകുപ്പ് ഉദ്യോഗസ്ഥര്‍ കാട്ടാനയെ തിരികെ വനത്തിലേക്ക് കയറ്റിവിട്ടു.