ഇതാ മുക്കൈ മാതൃക

പാലക്കാട്

പ്രളയത്തിൽപ്പോലും തകരാതെ ഒരു അതിജീവന മാതൃകയുണ്ട്​ കടുക്കാംകുന്നം മുക്കൈപ്പുഴയിൽ. ജില്ലയിലെ കുടിവെള്ള വിതരണത്തിനുള്ള പ്രധാന പൈപ്പ്​ലൈനാണ്​ പ്രളയത്തിലും തകരാത്ത രീതിയിൽ പുനർനിർമിച്ചത്​. 2018ലെ മഹാപ്രളയത്തിൽനിന്ന്​ പാഠമുൾക്കൊണ്ട് ഡക്റ്റൈൽ അയേൺ പൈപ്പുകൾ​​ ഉപയോഗിച്ചായിരുന്നു നിർമാണം. പാലത്തിൽനിന്ന്​ പത്തടിയോളം ഉയരത്തിൽ ഇരുമ്പുചാനൽ തീർത്ത് അതിനുള്ളിലൂടെയാണ് പൈപ്പ്​ ലൈൻ കടത്തിവിട്ടത്. ഇത്​ കേരളത്തിലെ ജലവിതരണ മേഖലയ്​ക്ക് മാതൃകയാകുകയാണ്. 2018ലെ പ്രളയത്തിൽ പൈപ്പുകൾ ഒഴുകിപ്പോയതാണ്​ ഇത്തരത്തിൽ സുരക്ഷാക്രമീകരണങ്ങൾക്ക്​ ജലഅതോറിറ്റിയെ നിർബന്ധിച്ചത്​. മുക്കൈപ്പുഴയിലുണ്ടായ ശക്തമായ ഒഴുക്കിൽ പൈപ്പ്​ലൈനും പാലവും അന്ന്​ ഒലിച്ചുപോയിരുന്നു. ശക്തമായ വെള്ളപ്പാച്ചിലിൽ പൈപ്പ് ലൈനിന്റെ 60 മീറ്റർ വേർപെട്ട്​ ഒലിച്ചുപോയി. ഇതോടെ ജില്ലയിൽ ജലവിതരണം താറുമാറായി. സർക്കാരിന്റെ നിർദേശപ്രകാരം ഉടൻ മലമ്പുഴ ജല അതോറിറ്റി ജീവനക്കാർ അറ്റകുറ്റപ്പണി നടത്തി. തുടർന്ന്​ ആധുനിക രീതിയിലുള്ള ഡക്റ്റൈൽ അയേൺകൊണ്ട് നിർമിച്ച അത്യാധുനിക പൈപ്പുകൾ ചിറ്റൂർ സബ് ഡിവിഷനിൽനിന്ന് എത്തിച്ചു. 72 മണിക്കൂറിനകം പൈപ്പ് ലൈൻ പുനഃസ്ഥാപിച്ചു.