മേൽപ്പാലങ്ങളുടെ തകർച്ചയ്‌ക്ക്‌ അടിയന്തര പരിഹാരം കാണണം: കെ രാധാകൃഷ്ണൻ എംപി

വടക്കഞ്ചേരി

ദേശീയപാതയിലെ മേൽപ്പാലങ്ങളുടെ തകർച്ചയ്‌ക്ക്‌ അടിയന്തര പരിഹാരം കാണണമെന്ന് കെ രാധാകൃഷ്ണൻ എംപി. ചെന്നൈയിൽനിന്നുള്ള ഐഐടി സംഘത്തോടൊപ്പം വടക്കഞ്ചേരി മേൽപ്പാലത്തിൽ പരിശോധനയ്ക്കെത്തിയപ്പോൾ മാധ്യമങ്ങളോട് സംസാരിക്കുകയായിരുന്നു അദ്ദേഹം. മേൽപ്പാലങ്ങളുടെ തകർച്ച സംബന്ധിച്ച് കേന്ദ്ര ഗതാഗത മന്ത്രിക്ക് കത്ത് നൽകിയിരുന്നു. മേൽപ്പാലങ്ങളുടേതുൾപ്പെടെ ദേശീയപാതയുടെ തകർച്ച പരിഹരിക്കുന്നതുവരെ പന്നിയങ്കരയിലെ ടോൾ പിരിവ് നിർത്തിവയ്ക്കാൻ കേന്ദ്ര സർക്കാരിനോട് പലതവണ ആവശ്യപ്പെട്ടിട്ടുണ്ടെന്നും എംപി പറഞ്ഞു. ദേശീയപാതയിലെ മേൽപ്പാലങ്ങളുടെ തകർച്ചയ്ക്ക് ശാശ്വത പരിഹാരം കണ്ടില്ലെങ്കിൽ ശക്തമായ പ്രക്ഷോഭം നടത്തുമെന്ന് പി പി സുമോദ് എംഎൽഎ പറഞ്ഞു.