വേണമൊരു മാറ്റം 
കൊടുവള്ളിയ്ക്കും

കൊടുവള്ളി

കൊടുവള്ളി നഗരസഭ രൂപീകരിച്ചപ്പോൾമുതൽ തുടർച്ചയായി 10 വർഷത്തിലധികമായി യുഡിഎഫാണ്‌ ഭരിക്കുന്നത്‌. ഒപ്പം നഗരസഭയായി ഉയർത്തിയ മുക്കത്ത്‌ സ്വപ്‌നതുല്യമായ വികസനങ്ങളുമായി കുതിക്കുന്പോൾ കൊടുവള്ളി കിതയ്‌ക്കുകയാണ്‌. സംസ്ഥാനത്തെ നഗരസഭകളിൽ സ്വന്തമായി ആസ്ഥാനമില്ലാത്ത ഏക നഗരസഭയെന്ന ദുരവസ്ഥയിലാണ്‌ കൊടുവള്ളി. അഴിമതിയും സ്വജനപക്ഷപാതവും കൈമുതലാക്കി നഗരസഭയാകെ തകർത്തിരിക്കുകയാണ്‌ യുഡിഎഫ്‌. നഗരസഭയിലെ പ്രധാനപ്പെട്ട ഒട്ടുമിക്ക സ്ഥാപനങ്ങളും വാടകയ്‌ക്ക്‌ നൽകി കമീഷനടിക്കുകയായിരുന്നുവെന്ന ആരോപണമുണ്ട്‌. മൃഗാശുപത്രി, കൃഷിഭവൻ, ഐടിഐ ഉൾപ്പെടെയുള്ള പ്രധാനപ്പെട്ട എല്ലാ സ്ഥാപനങ്ങൾക്കും സ്വന്തമായി കെട്ടിടമില്ല. സംസ്ഥാന സർക്കാരിന്റ വികസന നേട്ടങ്ങൾ ഉയർത്തിയാണ്‌ എൽഡിഎഫ്‌ ജനങ്ങളെ സമീപിക്കുന്നത്‌. യുവാക്കളും വനിതകളും കഴിവ്‌ തെളിയിച്ച പ്രമുഖരുമാണ്‌ സ്ഥാനാർഥികൾ. കേരള മിനറൽ ഡെവലപ്‌മെന്റ് കോർപറേഷൻ ചെയർമാനും മുൻ പഞ്ചായത്ത്‌ പ്രസിഡന്റുമായ വായോളി മുഹമ്മദ്‌, സിപിഐ എം ഏരിയാ കമ്മിറ്റിയംഗം കെ ജമീല, നാഷണൽ ലീഗ്‌ സംസ്ഥാന ജനറൽ സെക്രട്ടറി സി പി നാസർകോയ, ജെഡിഎസ്‌ ജില്ലാ പ്രസിഡന്റ്‌ അബ്ദുള്ള മതോലത്ത്‌, വഖഫ്‌ ബോർഡ്‌ അംഗവും മുൻ പ്രസിഡന്റുമായ റസിയ ഇബ്രാഹിം, നാഷണൽ യൂത്ത്‌ലീഗ്‌ സംസ്ഥാന ജനറൽ സെക്രട്ടറി ഒ പി റഷീദ്‌ തുടങ്ങിയ പ്രമുഖരാണ്‌ മത്സരരംഗത്തുള്ളത്‌. അടിസ്ഥാന സ‍ൗകര്യങ്ങളുള്ള പൊതുശ‍ൗചാലയംപോലും നഗരസഭയിലില്ല. വരുമാനം കുറഞ്ഞ പല പഞ്ചായത്തുകളും കുടിവെള്ള പദ്ധതി മികച്ചതായി നടപ്പിലാക്കിയപ്പോൾ കൊടുവള്ളിയിൽ ഇന്നും കുടിവെള്ളം കിട്ടാക്കനിയാണ്‌. സര്‍ക്കാര്‍ ഫണ്ടും വിവിധ ഏജന്‍സികളുടെ സഹായവും സ്വീകരിച്ച് നഗരസഭയ്‌ക്ക് സ്വന്തമായി ഓഫീസ് സമുച്ചയം നിര്‍മിക്കും. കൊടുവള്ളി ടൗണില്‍ സ്ഥലം ഏറ്റെടുത്ത് ഷോപ്പിങ്‌ കോംപ്ലക്‌സും വിപുലമായ സൗകര്യങ്ങളുള്ള ബസ്‌ സ്‌റ്റാന്‍ഡും നിര്‍മിക്കും, വഴിയോര വിശ്രമകേന്ദ്രവും വിപുലമായ സൗകര്യങ്ങളുമുള്ള കംഫര്‍ട്ട് സ്റ്റേഷനും നിര്‍മിക്കുമെന്നും എൽഡിഎഫ്‌ ഉറപ്പുനൽകുന്നു. നഗരസഭാ പരിധിയിലെ എല്ലാ സ്‌കൂളുകളും സ്മാര്‍ട്ട് ആക്കുന്നതിനും വിദ്യാര്‍ഥികള്‍ക്ക് സൗജന്യ ഇന്റര്‍നെറ്റ് സൗകര്യം ലഭ്യമാക്കും. മത്സര പരീക്ഷകള്‍ക്കുള്ള പരിശീലനത്തിന് സ്ഥിരം സംവിധാനം, കൊടുവള്ളിയില്‍ സ്ഥലം കണ്ടെത്തി ദേശീയ നിലവാരത്തിലുള്ള സ്റ്റേഡിയം, തരിശുഭൂമി കൃഷിയോഗ്യമാക്കുന്നതിനും അടുക്കളത്തോട്ടം പ്രോത്സാഹിപ്പിക്കുന്നതിനും പ്രത്യേകം പദ്ധതി, കൊടുവള്ളിയിലെ ഗതാഗതക്കുരുക്ക് പരിഹരിക്കുന്നതിന് ടൗണില്‍ ഓട്ടോമേറ്റഡ് മള്‍ട്ടിലെവല്‍ പാര്‍ക്കിങ്‌ സംവിധാനം, ക്ലീന്‍ കൊടുവള്ളി ബ്യൂട്ടിഫുള്‍ കൊടുവള്ളി തുടങ്ങി ജനങ്ങൾക്ക്‌ ആവശ്യവമായ നിരവധി പദ്ധതികളാണ്‌ എൽഡിഎഫ്‌ പ്രകടന പത്രികയിൽ മുന്നോട്ട് വച്ചിട്ടുള്ളത്. നഗരസഭയിൽ പുതിയതായി ഒരു ഡിവിഷൻകൂടി രൂപീകരിച്ചതിനാൽ എണ്ണം 37 ആയി.