തുറന്നു അറിവിന്റെ പുതുലോകം

സ്വന്തം ലേഖകൻ കോഴിക്കോട്‌ പത്തിന്റെ പടികടന്ന്‌ അവർ പുതിയ അക്ഷരമുറ്റങ്ങളിലെത്തി. ഇനി അറിവിന്റെ വലിയ ലോകത്തേക്ക്. മൂന്ന്‌ അലോട്ട്മെന്റിലായി പ്രവേശനം നേടിയ 31,349 കുട്ടികളാണ്‌ ആദ്യദിനത്തിൽ പ്ലസ്‌വൺ ക്ലാസുകളിലെത്തിയത്‌. ജൂൺ 28ന്‌ നാലാം അലോട്ട്മെന്റ്‌ കൂടി കഴിയുന്നതോടെ എസ്‌എസ്‌എൽസി പരീക്ഷ പാസായ മുഴുവനാളുകൾക്കും പ്രവേശനം ലഭ്യമാകും. ഇ​തു​വ​രെ അ​പേ​ക്ഷി​ക്കാ​ൻ ക​ഴി​യാ​ത്ത​വ​ർ​ക്ക് സ​പ്ലി​മെ​ന്റ​റി അ​ലോ​ട്ട്മെ​ന്റി​നായി പു​തി​യ അപേ​ക്ഷ​ നൽകാം. മു​ഖ്യ​ഘ​ട്ട​ത്തി​ൽ തെ​റ്റാ​യ വി​വ​ര​ങ്ങ​ൾ നൽ​കി​യ​തി​നാ​ലും ഓ​പ്ഷ​നു​ക​ൾ ന​ൽ​കാ​ത്ത​തി​നാ​ലും അ​ലോ​ട്ട്മെ​ന്റി​ന് പ​രി​ഗ​ണി​ക്കാ​ത്ത​വ​ർ​ക്കും സ​പ്ലി​മെ​ന്റ​റി ഘ​ട്ട​ത്തി​ൽ പുതി​യ അ​പേ​ക്ഷ നൽകുകയോ നിലവിലുള്ളത്‌ പുതുക്കുകയോ ചെയ്യാം. ആദ്യഘട്ടത്തിൽ അലോട്ട്‌മെന്റ്‌ ലഭിച്ചിട്ടും തെറ്റായ വിവരങ്ങൾ അപേക്ഷയിൽ ഉൾപ്പെട്ടതിനാൽ പ്രവേശനം നിഷേധിക്കപ്പെട്ടവർക്കും ഈ അവസരത്തിൽ തെറ്റുതിരുത്തി അപേക്ഷ പുതുക്കിനൽകാം. എസ്‌എസ്‌എൽസി പരീക്ഷ പാസായവരിൽ ഒരുവിഭാഗം വിഎച്ച്‌എസ്‌സി, ഐടിഐ, പോളിടെക്നിക്‌ കോളേജുകളിലേക്കും ഉപരിപഠനത്തിനായി പോകും. ഇതിനുപുറമെ സ്വകാര്യ സ്കൂളുകളിലും സീറ്റുകൾ ഒഴിവുണ്ട്‌. ജില്ലാതല പ്രവേശനോത്സവം ‘വരവേൽപ്പ്‌’ കാരപ്പറമ്പ്‌ ഗവ. ഹയർ സെക്കൻഡറി സ്കൂളിൽ ജില്ലാ പഞ്ചായത്ത്‌ പ്രസിഡന്റ്‌ ഷീജ ശശി ഉദ്‌ഘാടനംചെയ്തു. കൗൺസിലർ എൻ ശിവപ്രസാദ്‌ അധ്യക്ഷനായി. റീജണൽ ഡെപ്യൂട്ടി ഡയറക്ടർ ആർ രാജേഷ്‌കുമാർ, ജി മനോജ്‌കുമാർ, സി കെ മനോജ്‌, ദീപാഞ്ജലി മണക്കടവത്ത്‌, കെ ജെറീഷ്‌, കെ പ്രദീപ്‌കുമാർ എന്നിവർ സംസാരിച്ചു.