കുതിക്കാം കൂടുതൽ മുന്നോട്ട്

കൊല്ലം

വിഴിഞ്ഞം രാജ്യാന്തര തുറമുഖത്തിന്റെ അനന്തസാധ്യതകൾ പ്രയോജനപ്പെടുത്തി ജില്ലയിൽ നടപ്പാക്കുന്ന ബൃഹത്തായ വികസന പദ്ധതികൾ ഉൾപ്പെടെ നാടിന് ക്ഷേമവും വികസനവും ഉറപ്പാക്കുന്ന ജില്ലാ പഞ്ചായത്ത് പ്രകടന പത്രികയുമായി എൽഡിഎഫ്. കൊല്ലം പ്രസ്‌ക്ലബ്ബിൽ നടന്ന ചടങ്ങിൽ ‘തദ്ദേശ സ്വയംഭരണ തെരഞ്ഞെടുപ്പ് 2025' പ്രകടനപത്രിക എൽഡിഎഫ് നേതാക്കൾ പ്രകാശിപ്പിച്ചു. ജില്ലയിൽ ഒരു മുന്നണി ഇറക്കുന്ന ആദ്യ തെരഞ്ഞെടുപ്പ് പത്രികയാണിത്‌. നാടിന്റെ സാമ്പത്തിക അഭി‌വൃദ്ധിയോടൊപ്പം ജനങ്ങളുടെ അടിസ്ഥാന ആവശ്യങ്ങളും ക്ഷേമവും ഉറപ്പുവരുത്തുന്ന എൽഡിഎഫ് തുടർഭരണത്തിന്‌ ആവശ്യമായ വിജയം തെരഞ്ഞെടുപ്പിൽ നേടുമെന്ന്‌ നേതാക്കൾ വാർത്താസമ്മേളനത്തിൽ പറഞ്ഞു. സംസ്ഥാന സർക്കാർ പ്രഖ്യാപിച്ച ‘വിഴിഞ്ഞം-– കൊല്ലം-– പുനലൂർ വികസന ഇടനാഴി' കേന്ദ്രീകരിച്ചാകും ജില്ലയിലെ പുതിയ വികസന പ്രവർത്തനങ്ങളെന്ന്‌ ധനമന്ത്രി കെ എൻ ബാലഗോപാൽ പറഞ്ഞു. ജില്ലാ പഞ്ചായത്തിന്റെ നേതൃത്വത്തിൽ തദ്ദേശസ്വയംഭരണ സ്ഥാപനങ്ങളുടെ സഹകരണത്തോടെയാണ് പദ്ധതികൾ ആവിഷ്കരിക്കുന്നത്. വ്യവസായം, ഐടി, ടൂറിസം, ഫുഡ് പ്രോസസിങ്‌, ലോജിസ്റ്റിക്സ് തുടങ്ങിയ മേഖലകളിൽ പുതിയ പാർക്കുകളും അടിസ്ഥാന സൗകര്യങ്ങളും ഒരുക്കുന്നതിനാണ് പ്രഥമ പരിഗണന. മുനിസിപ്പൽ ബോണ്ടുകൾ പോലുള്ള നൂതന നിക്ഷേപമാർഗങ്ങൾ ഉപയോഗപ്പെടുത്തി വികസന പ്രവർത്തനങ്ങൾക്ക് ആവശ്യമായ പണം കണ്ടെത്തുന്നതിന്‌ തദ്ദേശ സ്ഥാപനങ്ങളെ പ്രോത്സാഹിപ്പിക്കും. ആദിവാസി ഊരുകളിൽ ശിശുമരണ നിരക്ക് ഇല്ലാതാക്കിയ മാതൃകയിൽ അഞ്ചുവർഷം കൊണ്ട് കൊല്ലത്തെ ശിശുമരണമില്ലാത്ത ജില്ലയാക്കും. എല്ലാ വാർഡിലും വനിതാ ഫിറ്റ്നസ് സെന്ററുകൾ സ്ഥാപിക്കും. പാൽ, ജൈവ പച്ചക്കറി ഉൽപ്പാദനത്തിൽ സ്വയം പര്യാപ്തത കൈവരിക്കുന്നതിനുള്ള പദ്ധതികൾ നടപ്പാക്കും.