തിരുവനന്തപുരം– താംബരം സ്പെഷ്യൽ ട്രെയിൻ സർവീസ് നീട്ടണം

കൊല്ലം

ദീപാവലിയും ശബരിമല തീർഥാടനകാലവും അടുത്തുവന്ന സാഹചര്യത്തിൽ തിരുവനന്തപുരം സെൻട്രൽ– താംബരം– തിരുവനന്തപുരം സെൻട്രൽ സ്പെഷ്യൽ എക്സ്പ്രസ് ട്രെയിനിന്റെ (നമ്പർ 06110/06109) സർവീസ് കാലാവധി നീട്ടണമെന്ന ആവശ്യം ശക്തം. കൊല്ലം– പുനലൂർ–ചെങ്കോട്ട വഴി സർവീസ് നടത്തുന്ന സ്പെഷ്യൽ എക്സ്പ്രസിന്റെ സർവീസ് നിലവിൽ 28 വരെ മാത്രമാണ്. ഉത്സവകാലത്തും തീർഥാടന സീസണിലും യാത്രക്കാരുടെ തിരക്ക് വർധിക്കാനിരിക്കെ സർവീസ് നീട്ടാൻ റെയിൽവേ അടിയന്തര നടപടി സ്വീകരിക്കണമെന്നാണ് യാത്രക്കാരുടെ ആവശ്യം. നവംബർ എട്ടിനാണ് ദീപാവലി. ദീപാവലി ആഘോഷങ്ങൾക്കായി തമിഴ്നാട്ടിലേക്കും കേരളത്തിലേക്കും യാത്ര ചെയ്യുന്നവർക്ക് ഈ സ്പെഷ്യൽ ട്രെയിൻ ഏറെ പ്രയോജനകരമാണ്. അവധിക്കാലത്തും ഉത്സവദിവസങ്ങളിലും ട്രെയിനുകളിൽ യാത്രക്കാരുടെ തിരക്ക് വർധിക്കുന്ന സാഹചര്യത്തിൽ സർവീസ് അവസാനിപ്പിക്കുന്നത് യാത്രക്കാർക്ക് ബുദ്ധിമുട്ടുണ്ടാക്കും. അതിനാൽ തിരുവനന്തപുരം സെൻട്രൽ– താംബരം–തിരുവനന്തപുരം സെൻട്രൽ സ്പെഷ്യൽ ട്രെയിനിന്റെ സർവീസ്‌ കാലാവധി നീട്ടുന്നത്‌ യാത്രക്കാർക്ക്‌ ഏറെ സ‍ൗകര്യവും റെയിൽവേക്ക്‌ ആദായകരവുമാകും. നവംബർ പകുതിയോടെ ശബരിമല ക്ഷേത്രം മണ്ഡല-മകരവിളക്ക് തീർഥാടനകാലത്തിനായി തുറക്കുന്നതോടെ പുനലൂർ വഴി സഞ്ചരിക്കുന്ന ശബരിമല തീർഥാടകരുടെ എണ്ണത്തിൽ വലിയ വർധനയുണ്ടാകും. കൊല്ലം– പുനലൂർ– ചെങ്കോട്ട റെയിൽവേ പാതയിലൂടെ എത്തുന്ന തീർഥാടകർക്ക് തിരുവനന്തപുരം– താംബരം സ്പെഷ്യൽ എക്സ്പ്രസിന്റെ സർവീസ് നീട്ടുന്നത്‌ വലിയ സഹായമാകും. പുനലൂർ റെയിൽവേ സ്റ്റേഷൻ കേന്ദ്രീകരിച്ച് ശബരിമലയിലേക്ക്‌ പോകുന്ന തീർഥാടകർക്ക്‌ തമിഴ്നാട്ടിന്റെ വിവിധ ഭാഗങ്ങളിൽനിന്ന് കേരളത്തിലേക്കും തിരിച്ചും യാത്രചെയ്യാൻ ഈ ട്രെയിൻ ഉപകരിക്കും. ശബരിമല സീസണിൽ യാത്രക്കാരുടെ തിരക്ക് വർധിക്കുന്ന സാഹചര്യത്തിൽ നിലവിലുള്ള ട്രെയിൻ സർവീസുകൾക്കൊപ്പം അധിക സർവീസുകൾ നിലനിർത്തുന്നത് യാത്രാദുരിതവും കുറയ്ക്കാൻ സഹായിക്കും. ദക്ഷിണ കേരളത്തെയും തമിഴ്നാട്ടിലെ വിവിധ പ്രദേശങ്ങളെയും ബന്ധിപ്പിക്കുന്ന കൊല്ലം– പുനലൂർ– ചെങ്കോട്ട റെയിൽവേ പാതയിലൂടെയുള്ള ട്രെയിനുകൾക്ക്‌ ഏറെ പ്രാധാന്യമുണ്ട്‌. ഉത്സവകാലത്തും തീർഥാടന സീസണിലും ഈ പാതയിലൂടെ കൂടുതൽ യാത്രക്കാരാണ്‌ സഞ്ചരിക്കുന്നത്‌. തിരുവനന്തപുരം സെൻട്രലിൽനിന്ന് താംബരത്തേക്കും തിരിച്ചുമുള്ള ഈ ട്രെയിൻ ദീർഘദൂര യാത്രക്കാർക്കും ആശ്വാസമാണ്‌.