കുളത്തൂപ്പുഴയുടെ 
മനമറിഞ്ഞ്

കുളത്തൂപ്പുഴ

തൊഴിലുറപ്പ് തൊഴിലാളികളുടെ സ്നേഹച്ചിരി കണ്ടുകൊണ്ടാണ് ജില്ലാ പഞ്ചായത്ത് കുളത്തൂപ്പുഴ ഡിവിഷൻ എൽഡിഎഫ് സ്ഥാനാർഥി എ എസ് ഷിബിന അണ്ടൂർപച്ച ട്രൈബൽ ഉന്നതിയിൽ പര്യടനം തുടങ്ങിയത്. തൊഴിലാളികളുടെ ക്ഷേമം അന്വേഷിച്ചു. അവരുടെ ആവശ്യങ്ങള്‍ ചോദിച്ചറിഞ്ഞു. ഒപ്പം വോട്ട് അഭ്യർഥിച്ചും ഭവന സന്ദർശനം നടത്തി. ​ആനപ്പെട്ട കോങ്കലിൽ സമ്മതിദായകരെ കണ്ട് വോട്ട് അഭ്യർഥിച്ച ശേഷം വെള്ളിമല റോഡിൽ ഇലക്ട്രിക് ക്രമിറ്റോറിയത്തിനു സമീപം ആനക്കിടങ്ങ് കുഴിക്കുന്ന തൊഴിലുറപ്പ് തൊഴിലാളികളെകണ്ടു. ആനശല്യത്തെക്കുറിച്ച് അന്വേഷിച്ചു. കിടങ്ങ് വന്നതിനുശേഷം ആന ശല്യം കുറവുണ്ടെന്ന് പ്രദേശവാസികൾ പറഞ്ഞു. കിടങ്ങ് പണി പൂർത്തിയാകുന്നതോടെ ആനശല്യം പൂർണമായും ചെറുക്കാൻ ആകുമെന്ന് കരുതുന്നതായും പറഞ്ഞു. മുൻ കാലങ്ങളിൽ ഉണ്ടായ ആനശല്യത്തെക്കുറിച്ച് തൊഴിലാളികളും സൂചിപ്പിച്ചു. തുടർന്ന് വെള്ഴിമല തേവർകുന്ന് ചെറുകടവ് ഭാഗങ്ങളും സന്ദർശിച്ചു. വരും ദിവസങ്ങളിൽ ഡിവിഷന്റെ മറ്റ് പ്രദേശങ്ങളിൽ പര്യടനം തുടരും. സിപിഐ ജില്ലാ കമ്മിറ്റി അംഗം ഗോപിനാഥപിള്ള, സിപിഐ എം ഇടമൺ ലോക്കല്‍ സെക്രട്ടറി വിനോദ്, സിപിഐ ഇടമൺ ലോക്കല്‍ സെക്രട്ടറി ബാബു ചെറിയാൻ തുടങ്ങിയവർ സ്ഥാനാര്‍ഥിക്കൊപ്പമുണ്ടായി. എ എസ് ഷിബിനയുടെ ആര്യങ്കാവ് പഞ്ചായത്തിലെ സ്വീകരണപരിപാടി സിപിഐ എം ജില്ലാസെക്രട്ടറിയുടെ ചുമതല വഹിക്കുന്ന എസ് ജയമോഹൻ ഉദ്ഘാടനം ചെയ്തു. സിപിഐ എം കഴുതുരുട്ടി ലോക്കൽ സെക്രട്ടറി പി രാജു അധ്യക്ഷനായി. ഏരിയ സെക്രട്ടറി അഡ്വ. പി സജി, സിപിഐ ജില്ലാ കൗൺസിൽ അംഗം സി അജയപ്രസാദ്, വി എസ് മണി, ബി രാജീവ്, ബിജുലാൽ പാലസ്, ആർ പ്രദീപ്, വി പി ഉണ്ണിക്കൃഷ്ണൻ, ലിജു ജമാൽ, രാജേന്ദ്രൻ നായർ , നവമണി , ശിവൻ കുട്ടി , എ എസ് ഷിബിന എന്നിവർ സംസാരിച്ചു. ബ്ലോക്ക്, പഞ്ചായത്ത് സ്ഥാനാർഥികളും പങ്കെടുത്തു.