പാളങ്ങൾ വേണ്ടാത്ത 
സോളാർ മെട്രോ

അതിരമ്പുഴ പാളങ്ങളില്ലാതെ തൂണുകളിലൂടെ കുതിക്കുന്ന സോളാർ മെട്രോ ട്രെയിൻ മാതൃകയുമായി പാലാ സെന്റ്‌ തോമസ് എച്ച്എസ്എസിലെ അൽബീന ജോമോനും ഡെവീന സിബിയും. സൗരോർജത്തിൽ പ്രവർത്തിക്കുന്ന മെട്രോയുടെ പ്രവർത്തനമാതൃകയാണ് ഇവർ അവതരിപ്പിച്ചത്. തൂണുകളിൽ സ്ഥാപിച്ച വീലുകളിലൂടെ നീങ്ങുന്ന ട്രെയിൻ അർധകാന്തിക സാങ്കേതികവിദ്യയുടെ സഹായത്തോടെയാണ് പ്രവർത്തിക്കുന്നത്. ഘർഷണം കുറയ്ക്കുന്നതിലൂടെ ഊർജോപഭോഗം കുറയ്ക്കാമെന്നതാണ് പ്രത്യേകത. കോൺക്രീറ്റ് ട്രാക്കിന്റെ ആവശ്യമില്ലാത്തതിനാൽ നിർമാണച്ചെലവും കുറയും. പരിസ്ഥിതി മലിനീകരണം കുറയ്ക്കുന്നതിനൊപ്പം വൈദ്യുതിയുടെ ഉപയോഗവും പരിമിതപ്പെടുത്താം. തൂണുകളിലൂടെയുള്ള സഞ്ചാരമായതിനാൽ കൂടുതൽ സ്ഥലം ഏറ്റെടുക്കേണ്ടിവരില്ല. നിലവിലുള്ള പാതകളെപ്പോലെ പ്രദേശങ്ങളെ രണ്ടായി വിഭജിക്കില്ലെന്ന്‌ വിദ്യാർഥിനികൾ പറഞ്ഞു.